1001
01/10/2017 1827-ci ildə - Qacarlarla müharibənin gedişində ruslar Mərəndi işğal etdi.
1891-ci ildə - İlk Azərbaycan pilotu, poruçik Fərrux ağa Məmmədkərim ağa oğlu Qayıbov (1891-1916) Qazax qəzasının (indiki Qazax şəhəri) Qıraq Salahlı kəndində, hərbçi ailəsində anadan olmuşdur. O, 1915-ci ildə üçüncü dərəcəli “Müqəddəs Stanislav” (qılınc və bantla birgə), yenə həmin ilin dekabr ayında dördüncü dərəcəli “Müqəddəs Anna” (üzərində “İgidliyə görə” yazısı ilə), 1916-cı ildə ikinci dərəcəli “Müqəddəs Stanislav” (qılınc və bantla birgə), 1917-ci ildə ikinci dərəcəli “Müqəddəs Anna” (qılıncla birgə), 1917-ci ilin martında üçüncü dərəcəli “Müqəddəs Anna” (qılınc və bantla birgə) və 1917-ci ilin mart ayında isə dördüncü dərəcəli “Müqəddəs Georgi” ordenlərinə layiq görülmüşdür.
1923-cü ildə - Azərbaycanın Əməkdar mədəniyyət işçisi, 1991-ci ildən Hüseyn Cavidin Bakıdakı ev-muzeyinin direktoru işləmiş Turan Hüseyn Cavid qızı Rasizadə (Turan Cavid) (1923-2004) Bakıda anadan olmuşdur. 1997-ci ildə Hüseyn Cavid mükafatı laureatı olmuşdur.
1927-ci ildə - SSRİ ilə İran arasında imzalanan "Qarşılıqlı təminatlar və neytrallıq haqqında" sazişdə iki ölkənin Xəzərdəki sərhədi Astara (Azərbaycan)- Həsənqulu (Türkmənistan) xətti üzrə müəyyənləşib. Bundan öncə eyni sərhəd xətti 1921-ci ildə imzalanmış müqavilədə əksini tapmışdı. Tərəflər bir-birinə qarşı siyasi və iqtisadi blokadada iştirak etmək barədə öhdəlik də götürüblər.
1934-cü ildə - Əməkdar elm xadimi, texnika elmlər doktoru, professor, AMEA-nın müxbir üzvü, “Şöhrət” ordeni ilə təltif olunmuş Elmira Məmmədəmin qızı Ramazanova Bakıda anadan olmuşdur.
1945-ci il oktyabrın 2-dən 4-dək - Təbrizdə Azərbaycan Demokratik Partiyasının I qurultayı keçirildi. ADP-nin qurultayda qəbul edilmiş proqramında milli məsələ barədə deyilirdi: "İran məmləkəti daxilində yaşayan hər bir nıillətin muxtariyyəti və öz müqəddəratını təyin etmək hüququ əyalət və vilayət əncümənləri vasitəsilə təmin edilməlidir".
1964-cü ildə - Azərbaycanın Milli Qəhərmanı Çingiz Adil oğlu Babayev (1964-1995) Bakı şəhərində anadan olmuşdur.
1981-ci ildə - Görkəmli aktyor, Xalq artisti Həsənağa Dərya oğlu Salayev (1921-1981) vəfat etmişdir. O, 1959-cu ildə “Azərbaycan Respublikasının Əməkdar artisti”, 1974-cü ildə isə “Xalq artisti” fəxri adlarına layiq görülmüşdür.
1991-ci ildə - İran hökuməti Bakıdan Naxçıvana gedən yük maşınlarının ölkə ərazisindən keçməsinə rəsmən razılıq verib. Bakı-Naxçıvan yolunun Ermənistan tərəfindən bağlanmasından sonra Azərbaycan hökuməti nəqliyyat dəhlizi ayrılması xahişi ilə İrana müraciət etmişdi.
1992-ci ildə - Ermənistan silahlı qüvvələri Xocavənd rayonunu tamamilə işğal ediblər. Xocavənd rayonu 1991-ci ilin noyabrında Dağlıq Qarabağ Muxtar Vilayəti ləğv edildikdən sonra Martuni və Hadrut rayonlarının əsasında (ərazisi 1458 kv km) yaradılmışdı. Rayon bir şəhər (Xocavənd-Martuni), iki iri qəsəbə (Qırmızıbazar və Hadrut), 83 kənddən (30-dək azərbaycanlılar yaşayan kənd) ibarətdir. 1992-ci ilin avqustunda Azərbaycan Ordusunun hissələri Xocavənd şəhərini və rayonun bir sıra kəndlərini nəzarətə götürsələr də, sonradan bu mövqeləri itirdilər.
1995-ci ildə - Azərbaycanla Özbəkistan arasında diplomatik əlaqələr qurulub. 1992-1993-cü illərdə Xalq Cəbhəsi hakimiyyəti dövründə Özbəkistanla münasibətlərdə soyuqluğun yaranması iki ölkənin rəsmi diplomatik əlaqələr qurmasını xeyli ləngitmişdi.
2001-ci ildə - Görkəmli bəstəkar, Azərbaycanın Əməkdar incəsənət xadimi Məmməd Mehdi oğlu Quliyev (1936-2001) Bakıda vəfat etmişdir.
2002-ci ildə - Azərbaycan Respublikası BMT-nin "İqtisadi və Sosial Şurasına" üzv seçildi.