1003    

03/10/2017

1806-cı ildə - Birinci Rusiya-Qacar müharibəsi (1804-1813) gedişində rus qoşunları Bakını işğal ediblər. Rus ordusu hələ 1806-cı ilin fevralında Bakını mühasirəyə almışdı. O zaman general Sisianov şəhərin təslim edilməsi ilə bağlı Bakı xanı Hüseynqulu xanla danışıqlar aparan zaman öldürülmüş və bundan sonra ruslar geri dönmüşdü. Yeni hücumla Bakını ələ keçirən rus qoşunları şəhərdə böyük qırğın və talan törətmişdi. İşğaldan sonra Bakı xanlığı
ləğv olundu və xanlığın ərazisində Rusiyanın Qafqaz hakimliyinin Bakı dairəsi yaradıldı.

1875-ci ildə - Görkəmli yazıçı, dramaturq Süleyman Sani Axundov (1875-1939) anadan olub. Yazıçının "Qorxulu nağıllar" adı altından toplanan hekayələri Azərbaycan uşaq ədəbiyyatının klassikası sayılır.

1921-ci ildə - Tanınmış tibb alimi, professor Tamerlan Əziz oğlu Əliyev (1921-1997) Naxçıvanın bölgəsinin Şahtaxtı kəndində anadan olmuşdur.

1946-cı ildə - Əməkdar elm xadimi, 2006-cı ildə isə “Şöhrət” ordeni ilə təltif olunmuş BDU-nun sabiq rektoru (1997-1998), sabiq Təhsil Naziri (1998-2013), AMEA Riyaziyyat və Mexanika İnstitutunun direktoru Misir Cumayıl oğlu Mərdanov Ermənistan SSR İcevan rayonunun Göyərçin kəndində, ziyalı ailəsində anadan olmuşdur. 

1955-ci ildə - Tarix üzrə elmlər doktoru, AMEA Elm Tarixi İnstitutunun direktoru Məryəm Həsən qızı Seyidbəyli Bakı şəhərində xalq artisti Həsən Seyidbəylinin ailəsində anadan olmuşdur.

1993-cü ildə - Azərbaycanda prezident seçkiləri keçirilib. 1993-cü il iyunun 24-də Milli Məclis tərəfindən Ə.Elçibəyin prezident səlahiyyətlərindən məhrum edilməsindən və həmin il avqustun 29-da bununla bağlı ümumxalq referendumu keçirilməsindən sonra növbədənkənar prezident seçkiləri elan edilmişdi. Seçkilərin rəsmi nəticələrinə görə, səsvermədə iştirak etmiş seçicilərin 98,8 faizi Heydər Əliyevin lehinə səs vermişdi. 

1996-cı ildə - Azərbaycan dövlət mükafatı laureatı, Xalq yazıçısı İlyas Məhəmməd oğlu Əfəndiyev (1914-1996) vəfat etdi və Fəxri Xiyabanda dəfn olundu. O, 1949-cu ildə “Şərəf nişanı”, 1971-ci ildə “Qırmızı əmək bayrağı”, 1974-cü ildə “Oktyabr inqilabı”, 1994-cü ildə “Şöhrət” ordenləri və bir çox medallarla təltif olunmuşdur.