1067    

09/10/2017

1910-cu ildə - Sovet İttifaqı Qəhrəmanı Həbibulla Eynulla oğlu Hüseynov (1910-1945) Ərdəbil şəhərində anadan olub. 

1944-cü ildə - General-mayor, şərqşünas alim, Azərbaycan Demokrartik Respublikasının Daxili işlər nazirinin müavini olmuş Məhəmməd Sadıq bəy Hacı İsmayıl oğlu Ağabəyzadə (1865-1944) Ukraynada Lvov şəhərində vəfat etmişdir. 

1958-ci ildə - Azərbaycanın Milli Qəhrəmanı Yunis Əsgər oğlu Əliyev (1958-1992) Goranboy rayonunun Qızılhacılı kəndində anadan olmuşdur.

1970-ci ildə - Oktyabr ayının 9-u bu ildən bütün dünyada poçt sahəsi işçilərinin peşə bayramı – Ümumdünya Poçt Günü kimi qeyd olunmağa başladı.

1991-ci ildə - Ali Sovetin növbədənkənar sessiyasında "Azərbaycan Respublikasının milli özünümüdafiə qüvvələri haqqında" qanun qəbul edilib. 1998-ci ilədək 9 oktyabr Azərbaycanda Milli Ordu günü kimi qeyd olunurdu. Həmin il prezident Heydər Əliyevin imzaladığı fərmanla Silahlı Qüvvələr günü kimi Xalq Cümhuriyyəti ordusunun yaranma tarixi (26 iyun 1918) qeyd olunmağa başlandı.

1992-ci ildə - Bakının "Azadlıq" meydanında Azərbaycan Milli Ordusunun ilk hərbi paradı keçirilib. Paradda Azərbaycan Silahlı Qüvvələrinin müxtəlif qoşun növləri, o cümlədən Qarabağda Ermənistan işğalçı qüvvələrinə qarşı bir sıra uğurlu əməliyyatlar keçirmiş ordu hissələri iştirak edib.

1997-ci ildə - Strasburqda Avropa Şurasının zirvə toplantısı (9-10 oktyabr) çərçivəsində Azərbaycan, Gürcüstan, Ukrayna və Moldova prezidentlərinin görüşü keçirilib. Görüşdə regional təhlükəsizlik və əməkdaşlıq sahəsində yeni məşvərətçi formatın - GUAM qrupunun yaradılması qərara alınıb. Bununla bağlı dörd ölkənin adından birgə bəyanat qəbul olunub.