"11 OKTYABR" TARIXIMIZDƏ
Ana səhifə > Xəbərlər > "11 Oktyabr" tariximizdə
1013    
10/10/2017

1827-ci ildə - Rus qoşunu Təbrizə hərəkət etdi. Eristov yazırdı: "Şəhərə rəhbərlik üçün göndərilmiş şahın kürəkəni və birinci naziri Allahyar xan əhalini və orada olan 2 batalyon sərbazı müdafiə olunmağa razı salmaq üçün hər vasitədən istifadə etdi". 1827-ci il oktyabrın 13-də rus qoşunu Təbrizə daxil oldu. Çoxlu qənimət – 40 top, mindən çox tüfəng, çoxlu mərmi ələ keçirildi  

1941-ci ildə - Azərbaycanın Guneyində ərəb əlifbası ilə Azərbaycan türkcəsində "Vətən yolunda" qəzetinin nəşrinə başladı.

1983-cü ildə - Nasir, Azərbaycan Yazıçılar Birliyinin üzvü, Azərbaycanın Xalq yazıçısı, Sosialist Əməyi Qəhrəmanı Süleyman Hüseyn oğlu Rəhimov (1900-1983) Bakıda vəfat etmiş, Fəxri Xiyabanda dəfn olunmuşdur. Bakı küçələrindən biri onun adını daşıyır.

1990-cı ildə - Görkəmli aşıq, Ümumittifaq Musiqi Cəmiyyətinin Rəyasət Heyətinə üzvü, Əməkdar mədəniyyət işçisi, Aşıqlar Birliyinin sədr müavini olmuş Mikayıl Cabbar oğlu Zeynalov (Mikayıl Azaflı) (1924-1990) vəfat etmişdir. Ölümündən sonra Tovuz şəhərində bir küçəyə aşığın adı verilmiş və Azaflı kəndində oxuduğu məktəbin önündə büstü qoyulmuşdur.

1992-ci ildə - Azərbaycanın Milli Qəhrəmanı Zakir Tofiq oğlu Yusifov (1956-1992) yüzədək hərbi uçuş keçirərək Əsgəran, Füzuli, Xocavənd, Tərtər, Ağdərə, Şuşakənd uğrunda gedən döyüşlərdə iştirak etmiş və Azərbaycan Hərbi Aviasiyasının döyüş salnaməsinə şanlı səhifələr yazmışdır. Səfiyan kəndində növbəti əməliyyat keçirən zaman Zakir Yusifovun vertolyotu vurulmuş və bütün heyət həlak olmuşdur. Həmin döyüşdə həlak olanlar arasında Azərbaycanın Milli Qəhrəmanı Tahir Əminağa oğlu Bağırov (1957-1992) da var idi. Baş çavuş olan Tahir Bağırov Mİ-24 helokopterində bort atıcısı vəzifəsini icra edirdi.

1998-ci ildə - Azərbaycanda növbəti prezident seçkiləri keçirilib. MSK-nın rəsmi məlumatına əsasən, seçkilərdə ölkə üzrə seçicilərin ümumi sayının (4,2 milyon nəfər) 79,18 faizi iştirak etmişdi. Dövlət başçısı Heydər Əliyev seçicilərin böyük əksəriyyətinin (76,11 faiz) etimadını qazanaraq ikinci dəfə prezident seçilib. Ümumilikdə altı namizədin iştirak etdiyi seçkilərdə müxalifətdən AMİP sədri Etibar Məmmədov (14 faiz) ikinci yeri tutmuşdu.

1999-cu ildə - Azərbaycan-Ermənistan sərhədinin Sədərək rayonu (Naxçıxan Muxtar Respublikası) ərazisində prezidentlər Heydər Əliyev və Robert Koçaryan arasında görüş keçirilib. Bu, Azərbaycan və Ermənistan prezidentlərinin ilk sərhəd görüşü idi. Həmin gün, eyni zamanda, Azərbaycan və Ermənistan müdafiə nazirlərinin də görüşü olub və tərəflər atəşkəs rejimini möhkəmləndirmək barədə razılığa gəliblər.

2007-ci ildə - Azərbaycan prezidenti İlham Əliyev Vilnüsdə beynəlxalq enerji sammitində iştirak edib. 2007-ci ilin mayında Krakovda keçirilən sammitin davamı olan toplantıda Azərbaycan, Litva, Gürcüstan, Ukrayna, Latviya və Polşa prezidentləri Xəzər-Qara dəniz-Baltik dənizi enerji dəhlizinin yaradılması, Odessa-Brodı neft kəməri və "Nabucco" qaz kəməri (Mərkəzi Asiya qazının Azərbaycan üzərindən Avropaya nəqli) layihələrinin dəstəklənməsi barədə bəyannamə qəbul ediblər.