1074
12/10/2017 1813-cü ildə - Rusiya ilə Qacarlar arasında müharibənin (1804-1813) başa çatması ilə bağlı Gülüstan sülh müqaviləsi imzalanıb. Qarabağın şimalında (indiki Goranboy rayonu) yerləşən Gülüstan kəndində imzalanan müqaviləyə əsasən, Azərbaycan torpaqları ikiyə bölünüb. Azərbaycanın Araz çayından şimaldakı torpaqları - Gəncə, Qarabağ, Şəki, Şamaxı, Quba, Bakı və Lənkəran xanlıqlarının ərazisi, həmçinin Şərqi Gürcüstan və Dərbənd Rusiya imperiyasının tərkibinə daxil edilib. Naxçıvan və İrəvan xanlıqları Qacarların nəzarətində qalıb. Sülh sənədini Rusiya tərəfdən çar I Aleksandrın xüsusi nümayəndəsi general Nikolay Rtişşev, Qacarlar tərəfdən Fətəli şahın təmsilçisi Mirzə Əbülhəsən imzalamışdı. Müqaviləyə əsasən, Qacarlar Xəzər dənizində hərbi donanma saxlamaq hüququnu itirib, rus tacirləri Qacar dövlətində güzəştli ticarət (5%-lik gömrük tarifi) hüququ əldə ediblər.
1918-ci ildə - Görkəmli oftalmoloq Şəfiqə İsa qızı İsmayılzadə (1918-2004) Gəncə şəhərində anadan olmuşdur.
1985-ci ildə - Akademik, Əməkdar elm xadimi Soltan Cəfər oğlu Mehdiyev (1914-1985) Bakı şəhərində vəfat etmişdir.
1992-ci ildə - Moskvada Rusiya və Azərbaycan arasında "Dostluq, əməkdaşlıq və qarşılıqlı təhlükəsizlik haqqında" müqavilə imzalanıb. Prezidentlər Boris Yeltsin və Əbülfəz Elçibəy tərəfindən imzalanan sənəd iki ölkə arasında münasibətlərin sahmanlanmasını vəd etsə də, bu, baş vermədi. Azərbaycan rəhbərliyinin yeritdiyi səbatsız xarici siyasət üzündən Rusiya ilə münasibətlər ciddi şəkildə pozulmuşdu.
1992-ci ildə - Ermənilər Hadrutdan böyük qüvvə ilə Qubadlının Torağac-Düzyurd yüksəkliyinə hücum etdi və onu ələ keçirdi. 16 gün gecə-gündüz davam edən döyüşdə strateji yüksəklik düşməndən (ermənilərdən) geri alındı.
2005-ci ildə - Gürcüstanın Marneuli rayonunda Bakı-Tbilisi-Ceyhan neft kəmərinin Gürcüstan hissəsinin açılış mərasimi keçirilib. Mərasimdə Azərbaycan, Gürcüstan və Türkiyə prezidentləri İlham Əliyev, Mixail Saakaşvili və Əhməd Necdət Sezər iştirak ediblər. 1768 km-lik kəmərin Gürcüstan hissəsi 249 km təşkil edir.