1019    

13/10/2017

1406-cı ildə - Qaraqoyunlu tayfa ittifaqının başçısı Qara Yusif ilə Əbubəkr ilk dəfə Naxçıvanın qərbində, Araz çayının sahilində toqquşdular. Qaraqoyunluların həmləsinə davam gətirməyən Teymurilər qaçmağa üz qoydular. Qara Yusif döyüş meydanından Naxçıvana gəldi. O, burada ikən Təbrizin adlı-sanlı rəislərindən olan Xacə Seyid Məhəmməd Keçəçi Qara Yusifin hüzuruna gəldi, Şəhərin Əbubəkr tərəfindən qarət olunduğunu söylədi və onu Təbrizə gəlməyə təşviq etdi. 

1919-cu ildə - Hərbi donanma üçün kadrların hazırlanması məqsədilə Bakı Dəniz Aviasiyası məktəbinin bazasında Xüsusi hərbi-dəniz aviasiyası məkəbindən sonra dəniz aviasiyası dəstəsi yaradıldı.

1933-cü ildə - Müasir Azərbaycan poeziyasının görkəmli nümayəndəsi, şair, tərcüməçi, publisist, 1957-ci ildən Azərbaycan Yazıçılar İttifaqının üzvü, Azərbaycan SSR Əməkdar mədəniyyət işçisi (1979), Azərbaycan Əməkdar incəsənət xadimi (1984), Azərbaycan SSR dövlət mükafatı laureatı (1988), Azərbaycanın xalq şairi Məmməd Araz (Məmməd İnfil oğlu İbrahimov) (1933-2004) Naxçıvan Muxtar Respublikası Şahbuz rayonunun Nurs kəndində anadan olub. Vətənpərvərlik, torpaqsevərlik, milli ruha sayğı şairin əsərlərinin aparıcı mövzusudur. Bir sıra rus şairlərinin əsərlərini dilimizə tərcümə edib.

1974-cü ildə - Azərbaycan rəssamlıq məktəbinin ən görkəmli nümayəndələrindən biri, əməkdar incəsənət xadimi (1960), xalq rəssamı (1963), dövlət mükafatı laureatı (1972) Səttar Bəhlul oğlu Bəhlulzadə (1909-1974) Moskvada vəfat etmiş, doğma Əmircan kəndində dəfn olunmuşdur. Əmircanda qəbirüstü abidəsi ucaldılmışdır.

1993-cü ildə - BMT-nin Təhlükəsizlik Şurası Ermənistan-Azərbaycan münaqişəsinə dair 874 saylı qətnamə qəbul edib. Sənəd oktyabrın 8-də Moskvada keçirilmiş yüksək səviyyəli Azərbaycan-Ermənistan danışıqlarının nəticəsi olaraq qəbul edilmişdi. Bu, Ermənistan-Azərbaycan münaqişəsinə dair BMT-nin ali qurumu tərəfindən qəbul edilən sayca üçüncü qətnamə idi. Sənəd ümumi xarakterli idi və tərəfləri münaqişənin dinc yolla həllinə çağırmaqla kifayətlənirdi.

2004-cü ildə - Ölkəmizin BMT-dəki daimi nümayəndəliyi "Azərbaycanın işğal olunmuş ərazilərində vəziyyət" adlı məsələnin BMT Baş Assambleyasının 59-cu sessiyasının gündəliyinə daxil edilməsi barədə quruma rəsmən müraciət edib. Qarabağ nizamlanmasına vasitəçilik edən ATƏT Minsk qrupunun həmsədr ölkələri (ABŞ, Rusiya, Fransa) Azərbaycanı bu təşəbbüsdən çəkindirməyə çalışsalar da, müsəlman ölkələri və GUAM ölkələrinin dəstəyi ilə məsələ oktyabrın 29-da Baş Assambleyanın gündəliyinə salındı və həmin il noyabrın 23-də müzakirəyə çıxarıldı.