1125    

14/10/2017

1830-cu ildə - Sentyabrın əvvəlində Həmzət bəyin 2 min nəfərlik dəstəsi Car vilayətinə daxil oldu. Carlılar üsyan qaldırdılar və dağıstanlılara qoşuldular. Yeni Zaqatala qalasında yerləşən çar qoşunu demək olar ki, hər yerdən təcrid olundu. Oktyabrın 15-də baş verən döyüşdə üsyançılar çar qoşununu məğlubiyyətə uğratdılar. Lakin kömək alan çar qoşunu tezliklə hücuma keçdi. Dağlılar Car-Balakəndən çəkildilər, üsyançılar isə düşmənin üstün qüvvələri ilə üzbəüz qaldılar. Çar qoşunu üç böyük kəndi – Car, Köhnə Zaqatala və Göyəm kəndlərini hücumla alaraq dağıtdı.   

1895-ci ildə - Füzuli ənənələrinin davamçısı, müasir Azərbaycan ədəbiyyatında qəzəl janrının görkəmli nümayəndəsi olan şair Əliağa Məmmədqulu oğlu İsgəndərov (Əliağa Vahid) (1895-1965) Bakıda doğulmuşdur.

1910-cu ildə - Kinorejissor, əməkdar incəsənət xadimi, Azərbaycan kino tarixində ilk rəngli bədii filmin (“O olmasın, bu olsun”) müəllifi Hüseyn Əli oğlu Seyidzadə (1910-1979) İrəvanda doğulub. 

1919-cu ildə - Azərbaycan Xalq Cümhuriyyətinin Parlamentində mətbuat haqqında qanun qəbul edilmişdi. Cümhuriyyət dövründə bu sahədə demokratik prinsiplərin yaşadığını iqtidaryönlü mətbuatla yanaşı, Azərbaycan və rus dillərində təqribən 40 adda nəşr olunan müxalifət qəzetinin də ("Əxbar", "Al bayraq", "Zəhmət sədası", "Azərbaycan füqərası", "Bednota", "Raboçiy put", "Məşəl" və b.) fəaliyyət göstərməsi sübut etməkdədir. Bunların içərisində ən fəal və güclüsü kommunist mətbuatı ("Nabat", "Füqəra sədası", "Hürriyyət") idi.

1969-cu ildə - Azərbaycanın Milli Qəhrəmanı Rövşən Abdulla oğlu Rzayev (1969-1999) Bakı şəhərinin Sahil qəsəbəsində anadan olmuşdur.

1988-ci ildə - Elm xadimi, ictimai-siyasi xadim, professor, AMEA-nın müxbir üzvü, Geologiya-mineralogiya elmləri doktoru, Milli Azadlıq Qərargahı təşkilatının qurucularından olan (1969), Böyük Britaniya Kral Akademiyasının fəxri üzvü (1957) Xudu Surxay oğlu Məmmədov (1927-1988) Bakıda vəfat etmişdir.

1991-ci ildə - Azərbaycanın Milli Qəhrəmanı, Qarabağ müharibəsi şəhidi İmamverdi Barat oğlu Əliyev (1950-1991) Hadrut rayonunun Şaqax kәndi yaxınlığında şəhid oldu. 

2002-ci ildə - Prezident Heydər Əliyev İstanbulda İqtisadi Əməkdaşlıq Təşkilatına (ECO) üzv olan ölkələrin dövlət başçılarının 7-ci sammitində iştirak edib. Sammitdə ECO ölkələri (Azərbaycan, Türkiyə, İran, Pakistan, Əfqanıstan, Qazaxıstan, Qırğızıstan, Özbəkistan, Türkmənistan, Tacikistan) arasında regional ticari-iqtisadi əməkdaşlığın genişləndirilməsi əsas mövzu olub.

2003-cü ildə - Azərbaycanda növbəti prezident seçkiləri keçirilib. Mərkəzi Seçki Komisiyasının rəsmi məlumatına görə, ölkə üzrə qeydə alınmış 4,442 mln. seçicidən 71,23 faizi səsvermədə iştirak etmişdi. Seçicilərin 76,84 faizi baş nazir, Yeni Azərbaycan Partiyasının sədr müavini İlham Əliyevə səs verib. Ümumilikdə 8 namizədin iştirak etdiyi seçkilərdə ikinci yeri "Müsavat" partiyasının başqanı İsa Qəmbər (12 faiz) tutub. 

2008-ci ildə - Azərbaycanda keçirilən növbəti prezident seçkilərində ölkə başçısı, Yeni Azərbaycan Partiyasının sədri İlham Əliyev ikinci müddətə prezident seçilib. Seçkinin rəsmi nəticələrinə əsasən, ölkə üzrə seçicilərin 75,64 faizi (3,7 mln. nəfər) səsvermədə iştirak edib və seçicilərin 88,73 faizi İlham Əliyevə səs verib. Seçkidə ümumilikdə 7 namizəd iştirak edib, 2-3-cü yerləri müxalifət nümayəndələri İqbal Ağazadə (Ümid Partiyası, 2,86 faiz) və Fazil Qəzənfəroğlu (Böyük Quruluş Partiyası, 2,47 faiz) tutub.