1011    

16/10/2017

1855-ci ildə - Görkəmli hərbi xadim, artilleriya general-leytenantı Səməd bəy Sadıx bəy oğlu Mehmandarov (1855-1931) Lənkəranda anadan olmuşdur. Çar Rusiyası ordusunda diviziya komandiri olub, 1918-1920-ci illərdə Azərbaycan Xalq Cümhuriyyətinin müdafiə naziri işləyib. Sovetləşmədən sonra Bakıda hərbi komandirlər məktəbində dərs deyib.

1921-ci ildə - Azərbaycan SSR-in Mərkəzi İcraiyyə Komitəsi Azərbaycan Dövlət Bankının yaradılması haqqında dekret verdi. Dövlət bankına ancaq respublikada pul dövriyyəsini nizamlamaq və qısamüddətli kreditlərin köməyi ilə kooperativlər, artellər və başqa birliklərin təsərrüfat fəaliyyətinin yaxşılaşmasına kömək etmək tapşırılmışdı. 

1923-cü ildə - Yazıçı, nasir, ədəbiyyatşünas, Azərbaycan Yazıçılar Birliyinin üzvü, filologiya elmləri doktoru, professor, Xalq yazıçısı, Antisovet "İldırım" təşkilatının qurucularından biri Gülhüseyn Hüseynoğlu (Abdullayev) (1923-2013) Masallı rayonunun Mollaoba kəndində anadan olmuşdur. 

1926-cı ildə - Görkəmli bəstəkar, dirijor, pedaqoq və ictimai xadim, Azərbaycanın Əməkdar incəsənət xadimi (1973), Azərbaycan Respublikasının Xalq artisti (1987), professor (2001), “Şöhrət ordeni” ilə təltif olunmuş Ramiz Hacı oğlu Mustafayev (1926-2008) Türkmənistan Respublikasının Cərco şəhərində anadan olmuşdur.

1949-cu ildə - Azərbaycan Milli Elmlər Akademiyasının vitse-prezidenti, filologiya elmləri doktoru, əməkdar elm xadimi, AMEA-nın həqiqi üzvü İsa Əkbər oğlu Həbibbəyli Azərbaycanın Naxçıvan MR-nın Şərur rayonunun Danyeri kəndində müəllim ailəsində anadan olmuşdur. 

1963-cü ildə - Azərbaycanın Milli Qəhrəmanı Səfəralı Qurban oğlu Məmmədov (1963-1992) Masallı rayonunda anadan olmuşdur.

1984-cü ildə - Türkoloq, filologiya elmləri doktoru, professor, müasir türkologiyanın inkişafında müstəsna xidmətləri olan elm adamlarından biri - Fərhad Ramazan oğlu Zeynalov (1929-1984) vəfat etmişdir. 

1992-ci ildə - Azərbaycanın bir qrup ziyalısı Naxçıvan Muxtar Respublikası Ali Məclisinin sədri Heydər Əliyevə müraciət edərək ondan ölkənin siyasi həyatında fəal iştirak etməyi və yeni yaradılan siyasi təşkilata liderliyi üzərinə götürməyi xahiş edib. "Səs" qəzetində dərc olunan müraciətə 91 nəfər imza atmışdı. Bu hadisə Azərbaycanın yeni tarixinə "91-lərin təşəbbüsü" kimi düşdü. Heydər Əliyev müraciətə müsbət cavab verdi və Azərbaycanın siyasi həyatında yeni təşkilatın, Yeni Azərbaycan Partiyasının təşəbbüs qrupu yarandı.

1996-cı ildə - Milli Məclisin iclasında təşkilati məsələyə baxılıb. Yeni Azərbaycan Partiyası sədrinin müavini, partiyanın proporsional siyahısı üzrə millət vəkili seçilmiş Murtuz Ələsgərov parlamentin sədri seçilib. Bundan öncə (sentyabr) Milli Məclisin sədri Rəsul Quliyev istefa vermişdi.

2007-ci ildə - Prezident İlham Əliyev Tehranda Xəzəryanı ölkələrin (İran, Azərbaycan, Rusiya, Qazaxıstan və Türkmənistan) dövlət başçılarının ikinci sammitində (ilk sammit 2002-ci ilin aprelində Aşqabadda keçirilmişdi) iştirak edib. Zirvə toplantısında "Xəzər dənizinin hüquqi statusuna dair Konvensiya" layihəsi müzakirə edilib, birgə bəyannamə qəbul olunub.