1236    

18/10/2017

1894-cü ildə - Jurnalist, alim və ictimai xadim İsasultan Nəcəfqulu oğlu Şaxtaxtinski (1851-1894) Qars şəhərində vəfat etmişdir. Onun haqqında ədəbiyyatşünas alim Vilayət Quliyev “İsa Sultan Şaxtaxtinskinin qəribə həyatı” (Bakı, 1999) adlı monoqrafiya yazmışdır. 2010-cu ilin may ayının 13-də Kəngərli rayonunun Şahtaxtı kəndində Şahtaxtinskilərin ev-muzeyi istifadəyə verilmişdir.

1918-ci ildə - Tənqidçi, ədəbiyyatşünas, Azərbaycan Yazıçılar Birliyinin üzvü, filologiya elmləri doktoru, professor, Azərbaycanın Əməkdar elm xadimi, Azərbaycan milli yaradıcılıq akademiyasının müxbir üzvü Mirəli Mir Ələkbər oğlu Seyidov (1918-1992) Qərbi Azərbaycanın İrəvan şəhərində, fəhlə ailəsində anadan olmuşdur.

1922-ci ildə - Rusiya Kommunist (bolşevik) Partiyasının MK-nin Zaqafqaziya Ölkə Komitəsinin plenumu oldu. Plenium MK  Komissiyasının üzvü  Q.K.Orconikidzenin məlumatını dinləyərək, RK(b)P MK-nın qərarını qəti icra üçün yekdilliklə qəbul etdi, partiya və bitərəf kütlələr arasında təşviqat kampaniyasına başlamağı tapşırdı. Plenum Zaqafqaziya Sovetlər qurultayının çağırılmasını da bəyəndi.  

1948-ci ildə - Akademik, Milli Elmlər Akademiyasının sabiq prezidenti Mahmud Kərim oğlu Kərimov (1948-2013) anadan olub. Radiasiya təhlükəsizliyi, radioekologiya sahəsində fundamental elmi tədqiqat işlərinin müəllifidir. 2001-ci ildə AMEA-nın prezidenti seçilib.

1949-cu ildə - Azərbaycan Respublikasının Əməkdar incəsənət xadimi, Azərbaycan Respublikası Prezidentinin fərdi təqaüdçüsü, rejissor Vaqif İbrahim oğlu Həsənov (İbrahimoğlu) (1949-2011) Bakı şəhəri Mərdəkan qəsəbəsində anadan olmuşdur.

1965-ci ildə - Azərbaycanın Əməkdar incəsənət xadimi, rəssam Vəcihə Əli qızı Səmədova (1924-1965) Bakıda vəfat etmişdir. 

1970-ci ildə - Qarabağ müharibəsi iştirakçısı, "Azərbaycan Bayrağı" ordeni kavaleri və kəşfiyyat-diversiya dəstəsinin komandiri İbad Mövsüm oğlu Hüseynov Xocavənd rayonunda anadan olub. Haqqında 2010-cu ildə "Əsgər" sənədli film, 2016-cı ildə isə "Xüsusi təyinatlı İbad" bədii filmi çəkilmişdir. 

1991-ci ildə - Ali Sovet "Azərbaycan Respublikasının dövlət müstəqilliyi haqqında" Konstitusiya Aktı qəbul edib. Konstitusiya Aktı Azərbaycanın müstəqilliyini bərpa etməsi barədə parlamentin 1991-ci il 30 avqust tarixli Bəyannaməsinin davamı olaraq qəbul olunub. Respublikanın o vaxtkı rəhbərliyi bu prosesi xeyli ləngitsə də, nəticədə Azərbaycanın müstəqillik tarixi üçün böyük önəm kəsb edən sənəd qəbul edildi. Səsvermədə 360 nəfərlik Ali Sovetin 258 deputatı iştirak etmiş və hamısı lehinə səs vermişdi. 6 fəsil, 32 maddədən ibarət sənədin preambulasında 19181920-ci illər Xalq Cümhuriyyətinin süqutundan sonra Azərbaycanın Rusiya tərəfindən ilhaq edildiyi qeyd olunur, Konstitusiya Aktının Azərbaycan Milli Şurasının 1918-ci il 28 may tarixli İstiqlal Bəyannaməsinə əsaslandığı vurğulanırdı.

1991-ci ildə - Azərbaycanın şəhər və rayonlarında icra hakimiyyəti başçısı vəzifəsinin təsis edilməsi barədə fərman verilib.

1994-cü ildə - Prezident Heydər Əliyev türkdilli dövlətlərin başçılarının İstanbulda keçirilən 2-ci zirvə toplantısında iştirak edib.

2002-ci ildə - NATO-nun Avropadakı Birləşmiş Silahlı Qüvvələrinin rəhbəri, ABŞ-ın Avropadakı qoşunlarının baş komandanı Cozef Ralstonun Bakıya səfəri gedişində Azərbaycan hərbçilərinin Türkiyə kontingenti tərkibində Əfqanıstandakı sülhməramlı əməliyyatda iştirakı məsələsi razılaşdırılıb.