1036    

18/10/2017

1898-ci ildə - Tanınmış ədəbiyyatşünas alim, Azərbaycan Elmlər Akademiyasının həqiqi üzvü, filologiya elmləri doktoru, Əməkdar elm xadimi və Əməkdar müəllim Feyzulla Qasımzadə (1898-1976) anadan olub.

1946-cı ildə -  SSRİ Ali Soveti Rəyasət Heyəti xarici ölkələrdə yaşayan ermənilərin Ermənistan SSR ərazisinə köçürülməsi ilə bağlı Fərman verdi. Bu fərman Qərbi Azərbaycanın yerli əhalisinin deportasiyası hesabına reallaşdırıldı. 

1951-ci ildə - Qarabağ müharibəsi iştirakçısı, OMON komandiri (1992-1994), Azərbaycan Respublikasının daxili işlər nazirinin müavini (1994-1995) Rövşən Bəxtiyar oğlu Cavadov (1951-1995) Laçın rayonunda anadan olub.

1963-cü ildə - Əməkdar həkim, professor, Əməkdar elm xadimi, Azərbaycan SSR EA-nın müxbir üzvü Fuad Ələddin oğlu Əfəndiyev (1909-1963) Bakı şəhərində vəfat etmişdir.

1972-ci ildə - Azərbaycan Respublikasının Xalq artisti, Gürcüstan Respublikasının Əməkdar Artisti, “Qırmızı Əmək Bayrağı” və “Şərəf nişanı” ordenləri ilə təltif edilmiş vokal ustası, opera solisti Fatma xanım Səttar qızı Muxtarova (1893-1972) Bakıda vəfat etmiş və İkinci Fəxri Xiyabanda dəfn olunmuşdur.  

1991-ci ildə - Erməni dəstələri Dağlıq Qarabağın azərbaycanlı əhalisinə qarşı daha bir terror aktı törədiblər. Ağdərə (Mardakert) rayonunun Sırxavənd kəndi yaxınlığında minik avtomaşınının partladılması nəticəsində 3 nəfər həlak olub, 2 nəfər yaralanıb.

1992-ci ildə - Azərbaycan Milli Qəhrəmanı Vasili Əhməd oğlu Əliyev (1959-1992) Qaraqaya yüksəkliyi uğrunda gedən döyüşlərdə şəhid oldu. Qubadlı rayonunun Şəhidlər Xiyabanında dəfn edilmişdir. Qubadlı rayon mədəniyyət evi və Diləli-Müskanlı kənd orta məktəbi qəhrəmanın adını daşıyır. 

1995-ci ildə - Yazıçılar Birliyinin üzvü, şair Nоvruz İsmаyıl оğlu Sаdıqоv (Novruz Gəncəli) (1921-1995) Bakıda vəfat etmişdir. 

1999-cu ildə - Milli Məclis Azərbaycan hərbçilərinin Kosovoda sülhyaratma əməliyyatında iştirakına icazə verən qərar qəbul edib. Sənədə əsasən, 30 nəfərlik Azərbaycan taqımı Kosovodakı Türkiyə kontingentinin tərkibində xidmətə başlayıb. Bu, ölkəmizin iştirak etdiyi ilk sülhyaratma əməliyyatı idi. Azərbaycan hərbçilərinin Kosovoda xidməti 2008-ci ilədək davam etdi və həmin ilin martında parlamentin qərarı ilə sülhməramlı taqım geri çağırıldı.