966
26/10/2017 1880-ci ildə - Məşhur tarzən, xalq artisti Qurban Baxşəli oğlu Pirimov (1880-1965) Şuşa qəzasının Abdal-Gülablı kəndində anadan olub.
1900-cü ildə - Azərbaycan Xalq Cümhuriyyəti Parlamentinin xüsusi qərarına əsasən, dövlət hesabına ali təhsil almaq üçün xaricə göndərilmiş tələbələrdən biri, Paris Sülh Konfransına (1919-1920) göndərilmiş Azərbaycan Hökuməti nümayəndə heyətinin katibi, Əlimərdan bəy Topçubaşovun oğlu Rəşid bəy Topçubaşov (1900-1926) Tiflisdə anadan olub.
1907-ci ildə - Həkim, dermatoveneroloq, tibb elmləri doktoru (1936), professor (1940), Azərbaycan SSR-nin Əməkdar həkimi (1942) və Əməkdar elm xadimi (1956) Bahadur Əsgər bəy oğlu Eyvazov Qaryagin qəzasının Qarğabazar kəndində anadan olmuşdu.
1917-ci ildə - Bakıda "Müsavat" partiyasının I qurultayı (26-31 oktyabr) işə başlayıb. Qurultayda "Müsavat"ın ilk Proqramı qəbul olunub, Azərbaycanın müstəqilliyi uğrunda mübarizə partiyanın əsas məramı elan edilib. Məhəmməd Əmin Rəsulzadə partiyanın sədri seçilib.
1922-ci ildə - Rusiya Kommunist (bolşevik) Partiyası Zaqafqaziya Ölkə Komitəsinin "Sovet Sosialist Respublikaları İttifaqının yaradılması" tezisləri dərc olundu. SSR İttifaqının yaradılması partiya, sovet, həmkarlar təşkilatları və digər birləşmiş təşkilatlar tərəfindən dəstəkləndi. Respublikaların İttifaqının yaradılması uğrunda keçirilən kampaniya bu ideyanın Azərbaycanın qəzalarında zəhmətkeş kütlələri tərəfindən də bəyənildiyini göstərdi
1926-cı ildə - Məşhur neftçi Qurban Abasqulu oğlu Abbasov ("Neftçi Qurban", 1926-1992) Naxçıvanda anadan olub.
1941-ci ildə - SSRİ xalq artisti Şövkət Məmmədova təbrizlilər qarşısında geniş konsertlə çıxış etmişdir.
1966-cı ildə - BMT Baş Məclisinin XXI sessiyası İrqi Diskriminasiyanın Ləğvi Uğrunda Beynəlxalq Mübarizə Gününün təsis edilməsi haqqında qərar qəbul etdi. BMT Baş Məclisi bununla beynəlxalq ictimaiyyəti irqi ayrı-seçkiliyin bütün formalarının ləğvi uğrunda səyləri birləşdirməyə çağırdı.
1968-ci ildə - Azərbaycanın Milli Qəhrəmanı, Qarabağ müharibəsi şəhidi Şahlar İsa oğlu Hüseynov (1968-1992) Qərbi Azərbaycanın Dərəçiçək mahalının Razdan rayonunun Hankavan kəndində anadan olmuşdur.
1991-ci ildə - Azərbaycan SSR-nin Xarici İşlər Naziri (1959-1983) Tahirə Əkbər qızı Tahirova (1913-1991) Bakı şəhərində vəfat etmişdir.
1999-cu ildə - ABŞ dövlət katibinin müavini Stroub Telbott Qarabağ danışıqlarındakı vəziyyəti müzakirə etmək üçün İrəvana, oradan Bakıya gəlib. Həmin dövr sülh danışıqlarının intensiv mərhələsi idi və noyabrda ATƏT-in İstanbul sammitində müəyyən razılaşmanın imzalanacağı gözlənilirdi. Bu arada Azərbaycanda xarici siyasət məsələləri üzrə dövlət müşaviri Vəfa Quluzadə, XİN başçısı Tofiq Zülfüqarov, prezidentin köməkçisi Eldar Namazov istefa vermişdilər və gözlənilən sülh anlaşması ilə bağlı ictimai rəydə geniş ajiotaj vardı. Lakin oktyabrın 27-də Ermənistanda baş verən parlament terroru (spiker və baş nazirin qətlə yetirilməsi) sülh imkanlarını tamamilə heçə endirdi.