1016    

28/10/2017

1991-ci ildə - Ali Sovet Azərbaycanın müstəqilliyinin tanınması xahişi ilə BMT-yə müraciət qəbul edib. BMT Baş Assambleyası sovet respublikalarının təşkilata qəbulu məsələsini dekabrda müzakirəyə çıxarsa da, həmin vaxt yalnız üç Baltikyanı respublika üzvlüyə qəbul edildi. Azərbaycanın və keçmiş SSRİ-nin digər respublikalarının BMT-yə qəbulu 1992-ci il martın 2-də gerçəkləşdi.

1991-ci ildə - Azərbaycanın Milli Qəhrəmanı, AN-2 təyyarəsinin komandiri Əsəd Soltan oğlu Əsədov (1956-1991) 7 nəfər uçuş və texniki heyətlə Xocalı hava limanına kömək məqsədilə Xanabad kəndi üzərindən uçarkən düşmən tərəfindən  güclü  atəşə  tutulmuşdur. Cəsur komandir bu uçuş zamanı heyət üzvləri ilə birlikdə həlak olmuş, Zəngilan rayonunda dəfn edilmişdir.

1993-cü ildə - Ermənistan silahlı qüvvələrinin hücumu Zəngilan rayonunun, habelə Cəbrayıl və Füzuli rayonlarının Arazboyu yaşayış məntəqələrinin işğalı ilə başa çatıb. Zəngilan rayonunun mərkəzi və 93 yaşayış məntəqəsi (707 kv km) erməni qüvvələrinin əlinə keçib. Rayonun 35 min nəfər əhalisi didərgin düşüb. Zəngilan Ermənistanın hərbi təcavüzü zamanı Azərbaycanın sonuncu işğal edilən rayonudur. Erməni təcavüzü zamanı rayonun 200-dək sakini həlak olub.

1994-cü ildə - BMT-nin baş katibi Butros Butros Qali Azərbaycan prezidenti Heydər Əliyevin dəvətilə Bakıya səfərə gəlib. Səfər gedişində BMT baş katibi Azərbaycan prezidenti ilə danışıqlar aparmış, Milli Məclisdə çıxış etmiş, məcburi köçkünlərlə görüşmüşdü.

1994-cü ildə - Azərbaycanla Mavritaniya arasında diplomatik münasibətlər qurulub.

2004-cü ildə - BMT Baş Assambleyasının 59-cu sessiyasının iclasında "Azərbaycanın işğal olunmuş ərazilərində vəziyyət" adlı məsələ səs çoxluğu ilə sessiyanın gündəliyinə daxil edilib. Səsvermə zamanı 43 dövlət lehinə, 1 dövlət (Ermənistan) əleyhinə səs vermiş, 99 dövlət bitərəf qalmışdı. Məsələnin müzakirəsi noyabrın 23-də keçirildi.