1045
02/11/2017 1920-ci ildə - RSFSR Xalq Komissarları Şurası V.İ.Leninin imzası ilə Türküstan və Azərbaycanda pambıqçılığı bərpa etmək haqqında qərar qəbul etdi.
1923-cü ildə - 40 nəfərə qədər görkəmli alim və mütəxəssisin iştirakı ilə Azərbaycanı tədqiq və tətəbbö cəmiyyətinin ilk iclası keçirildi. 1924-cü illər SSRİ EA Diyarşünaslıq Bürosunun müxbir üzvü olan yazıçı Ə.Haqverdiyev Cəmiyyətin sədri seçildi. N.Nərimanov və S.Ağamalıoğlu isə Cəmiyyətin fəxri sədrləri, V.V.Bartold, N.Y.Marr və F.Oldenburq Cəmiyyətin fəxri üzvləri, H.Cəbiyev, M.Baharlı, R.Şabanov, prof. V.İ.Smirnov-Loqinov və İ.F.Blinov Cəmiyyətin üzvləri seçildilər. Cəmiyyətin təsisçiləri və ilk həqiqi üzvləri içərisində alimlərlə yanaşı, Q.Musabəyov, R.Axundov, D.Bünyadzadə, A.P.Serebrovski, S.M.Əfəndiyev, Ç.İldırım, Tağı Şahbazi kimi ictimai və dövlət xadimləri də var idi. İclasda A.Samoylov A.R.Zifeld, V.M.Sisiov, V.A.Ryumindən ibarət yaradılan işçi qrupu Cəmiyyətin fəaliyyət istiqamətlərini müəyyən etməli idi. Cəmiyyətin Naxçıvan, Dağlıq Qarabağ, Şamaxı, Lənkəran Gəncə, Zaqatala və Şəkidə şöbələri açıldı. Cəmiyyət təbiət və ictimai elmlər sahəsində çalışan respublika alimlərini birləşdirirdi. 1927-ci ilin sonunda Cəmiyyətin min nəfərdən artıq üzvü var idi. 1925-ci ildə Cəmiyyət əvvəlcə rus dilində, 1928-ci ildən isə Azərbaycan dilində "Azərbaycanı tədqiq və tətəbbö cəmiyyətinin xəbərləri"ni nəşr etməyə başladı. Cəmiyyət Azərbaycan xalqının ədəbi irsi və folklorunun öyrənilməsi sahəsində böyük iş aparırdı. Qabaqcıl yazıçı, filoloq və bəstəkarlar bu işə cəlb edilmiş, C.Məmmədquluzadə, Ə.Haqverdiyev, A.Sübhanverdixanov, Ü.Hacıbəyov, H.Zeynallı, S.Mümtaz, Y.V.Çəmənzəminli, H.Əlizadə, A.Baqriy və başqalarından ibarət xüsusi komissiya təşkil edilmişdi.
1934-cü ildə - Şair, Azərbaycan Yazıçılar Birliyinin üzvü, Mikayıl Müşfiq və "Qızıl qələm" mükafatları laureatı Oqtay Məhərrəm oğlu Rzalı (Oqtay Rza) Salyan rayonunun Qalalı kəndində anadan olmuşdur.
1944-cü ildə - Əfsanəvi partizan, Sovet İttifaqı Qəhrəmanı Mehdi Hüseynzadə (1919-1944) Sloveniyanın Vitovla kəndində alman faşistləri ilə döyüşdə həlak olub. M.Hüseynzadə Bakıda (Novxanı) doğulub, 1941-ci ildə cəbhəyə gedib, 1942-ci ilin dekabrında Stalinqradda əsir düşüb. 1944-cü ilin əvvəlində Yuqoslaviyada partizan hərəkatına qoşulub. Həyata keçirdiyi təxribat əməliyyatları nəticəsində 1000-dən çox alman hərbçisi həlak olub, faşistlərin onlarla hərbi təyyarəsi, döyüş texnikası məhv edilib.
1960-cı ildə - 1980-ci illərin axırlarında Azərbaycanda milli azadlıq ideyası ilə fəaliyyət göstərmiş "Çənlibel" təşkilatının yaradıcılarından və bu dövrdə formalaşmış milli azadlıq hərəkatının aparıcı şəxslərindən olmuş türkoloq, publisist və ssenarist Bəxtiyar Adil oğlu Şahverdiyev (Bəxtiyar Tuncay) Bakı şəhərində anadan olub.
1988-ci ildə - Azərbaycan SSR Ali Sovetinin deputatı olmuş Əməkdar artist, Xalq artisti fəxri adlarına layiq görülmüş Hökümə Abbasəli qızı Qurbanova (1913-1988) Bakıda vəfat etdi və Fəxri Xiyabanda dəfn olundu.
1990-cı ildə - Əməkdar elm xadimi, diafilm və sənədli filmlərin ssenari müəllifi, tənqidçi və ədəbiyyatşünas, filologiya elmləri doktoru Araz Məmməd oğlu Dadaşzadə (1936-1990) vəfat etmiş və Bakıda, II Fəxri Xiyabanda dəfn edilmişdir.
1992-ci ildə - Azərbaycanla Efiopiya arasında diplomatik əlaqələr qurulub.
1992-ci ildə - Əməkdar incəsənət xadimi, Azərbaycan Yazıçılar Birliyinin üzvü, şair Tofiq Mütəllim oğlu Mütəllibov (1929-1992) vəfat etdi.
1993-cü ildə - Prezident Heydər Əliyev xalqa müraciət edərək ölkə əhalisini geniş səfərbərliyə çağırıb. Müraciətdən sonra minlərlə insan Milli Orduya səfərbər olundu. Dövlət başçısı cəbhə xəttinə gedərək hərbi əməliyyatların hazırlanmasına rəhbərlik etdi. Noyabrın ortalarında Ermənistan ordusunun hücumlarının qarşısı alındı, dekabrda isə Azərbaycan qoşunları Füzuli rayonunun Arazboyu kəndləri istiqamətində əks-hücuma keçdi.
1994-cü ildə - Prezident Heydər Əliyev Ankarada Məhəmməd Füzulinin 500 illik yubiley tədbirlərində iştirak edib. Prezident səfər gedişində Türkiyə rəhbərliyi, ölkənin biznes nümayəndələri ilə görüşlər keçirib.
1997-ci ildə - Rejissor, ssenari müəllifi, aktyor, sənədli filmlərin bədii rəhbəri Niyazi Bədəlov (1909-1997) vəfat etmişdir.
2008-cü ildə - Moskvada, Rusiya dövlət başçısının "Mayn Dorf" iqamətgahında prezident Dmitri Medvedevin vasitəçiliyi ilə Azərbaycan və Ermənistan rəhbərlərinin növbəti görüşü olub. Görüşdən sonra prezidentlər İlham Əliyev, Serj Sarkisyan və Dmitri Medvedev Qarabağ münaqişəsinin sülh yolu ilə nizamlanmasına dair Bəyannamə imzalayıblar.