1144
05/11/2017 1920-ci ildə - Azərbaycan İnqilab Komitəsi "özlərinin şüursuzluğu və siyasi yetkinliyinin çatışmazlığı ucbatından istər ümumi, istərsə də siyasi xarakterli cinayətlər törətmiş bütün şəxslər" barəsində anınistiya tətbiq olunması haqqında dekret vermişdi.
1923-cü il noyabrın 6-7-də - Dağlıq Qarabağ Muxtar Vilayətinin Birinci Sovetlər qurultayı oldu. Qurultayda iştirak edən 132 nümayəndədən 116-sı erməni, 16-sı azərbaycanlı, 12-si qadın idi. Qurultay nümayəndələrinin 80 faizini kommunistlər təşkil edirdi.
1926-cı ildə - Azərbaycan radiosunun yarandığı gündür. Həmin gün Bakıda ilk radiostansiya fəaliyyətə başlayıb. İlk dövrdə radio verilişlərinin gündəlik efir vaxtı 2 saat təşkil edirdi. Sonradan bu vaxt 4 saata, daha sonra 6 saata çatdı. 1956-cı il fevralın 14-də isə Azərbaycanda ilk televiziya verilişi efirə çıxdı - Bakı televiziya studiyası fəaliyyətə başladı. 6 noyabr Azərbaycan televiziyası və radiosu günü kimi qeyd olunur.
1931-ci ildə - Şair, Azərbaycan Respublikası Uşaq Fondunun Bakı şöbəsinin sədri, rəyasət heyətinin üzvü, Azərbaycan Yazıçılar Birliyi Uşaq və gənclər ədəbiyyatı şurasının sədri Tofiq Mahmud oğlu Mehdiyev (1931- 1997) Naxçıvan Muxtar Respublikasının Şahbuz rayonunda anadan olmuşdur.
1943-cü ildə - Ukraynanın paytaxtı Kiyevin faşistlərdən azad edilməsi uğrunda döyüşlərdə qvardiya mayoru, tankçı, batalyon komandiri Xıdır Mustafayev yüksək məharət və igidlik nümayiş etdirmişdi. Noyabrın 6-da axşam batalyon gözlənilmədən düşmən arxasına keçərək beş saat davam edən küçə döyüşlərindən sonra Kiyevin 70 kilometrliyində olan Fastov şəhərini tutdu. Düşmən döyüş meydanında 64 top, 43 tank, hərbi təchizatlı 16 eşelon, 40 silah və ərzaq anbarı, 40 min ton yanacaq və lokomotiv qoyaraq qaçmışdı. Tank batalyonunun şəxsi heyətinin əksəriyyəti orden və medallarla təltif olunmuş, Xıdır Mustafayev isə SSRİ Ali Soveti Rəyasət Heyətinin 1944-cü il 10 yanvar tarixli Fərmanı ilə Sovet İttifaqı Qəhrəmanı adına layiq görülmüşdü.
1943-cü il noyabr ayının 6-11-də - Berlində Azərbaycan “Milli Birlik” Məclisinin təşəbbüsü ilə çağırılan Milli Azərbaycan Qurultayının keçirilməsində Əbdürrəhman Əli bəy oğlu Fətəlibəyli-Düdənginskinin böyük rolu olmuşdu. Müharibənin sonlarına yaxın Şərq cəbhəsində vuruşan Azərbaycan legionerlərinin sovet ordu hissələrinin əlinə keçməməsi üçün Ə.Fətəlibəylinin təşəbbüsü ilə birliklərin əvvəlcə cənub və qərb cəbhələrinə, bir müddətdən sonra isə o dövrdə daha sakit bölgə olan İtaliyaya köçürülməsinə başlanılmışdı.
1967-ci ildə - Bakı Metropoliteninin 5 stansiyası – "Bakı soveti", "26 Bakı komissarı", "28 aprel", "Gənclik" və "Nəriman Nərimanov" stansiyaları istismara verilmişdir.
1972-ci ildə - Bakı metropolitenin Bakının mərkəzini "8-ci kilometr" yaşayış massivi ilə birləşdirən yeni xətti işə düşdü.
1974-cü ildə - Şair, dramaturq, Əməkdar incəsənət xadimi İslam Əhməd oğlu Səfərli (1923-1974) vəfat etmiş, Fəxri Xiyabanda dəfn edilmişdir.
1996-cı ildə - Azərbaycanla Bəhreyn dövləti arasında diplomatik münasibətlər qurulub.
2005-ci ildə - Üçüncü çağırış Milli Məclisə seçkilər keçirilib. 2002-ci ildə Konstitusiyaya edilmiş dəyişikliklərə əsasən, seçkilər yalnız majoritar sistem (birmandatlı dairələr) üzrə keçirilib. İlk dəfə olaraq Xankəndi dairəsi üzrə də seçki keçirilmişdi. Seçkilərin Konstitusiya Məhkəməsi tərəfindən təsdiqlənən nəticələrinə görə, 115 dairədə deputatların seçildiyi elan olundu. Yeni Azərbaycan Partiyası 56 mandat, bitərəf namizədlər 40, müxalifət partiyaları isə ümumilikdə 15 mandat qazanmışdı. Daha bir neçə yeri iqtidaryönlü partiyaların təmsilçiləri əldə etmişdi. Pozuntular qeydə alınmış 10 dairə üzrə yeni seçkilər 2006-cı il mayın 13-nə təyin olundu.
2008-ci ildə - Azərbaycan prezidenti İlham Əliyev Türkiyəyə rəsmi səfəri gedişində Türkiyə Böyük Millət Məclisində çıxış edib. İlham Əliyev ikinci müddətə prezident seçildikdən sonra xaricə ilk rəsmi səfərini Türkiyəyə etmişdi. Səfər iki qardaş ölkə arasında münasibətlərin ən yüksək səviyyədə olduğunu bir daha göstərdi.
2009-cu ildə - Nasir, Azərbaycan Yazıçılar Birliyinin üzvü, M.F. Axundov adına Dövlət mükafatı laureatı, Əməkdar incəsənət xadimi Qılman İsabala oğlu Musayev (Qılman İlkin) (1914-2009) Bakıda vəfat etdi.
2013-cü ildə - Azərbaycan Milli Elmlər Akademiyasının Rəyasət Heyətinin iclasınının qərarı ilə “Nizami Gəncəvi adına Qızıl medal” təsis olunmuşdur.