1138    

13/11/2017

1918-ci ildə - Bolşevik Rusiyası "Brest sülhü"nün qüvvədən düşdüyünü elan edib. Bolşeviklər Rusiyanı I Dünya müharibəsindən çıxarmaq üçün Almaniya, Avstriya-Macarıstan, Bolqarıstan və Osmanlı ilə ağır şərtlər altında Brest sülhünü bağlamış (3 mart 1918) və çar dövründə Rusiyanın tərkibində olan Polşa, Baltikyanı ölkələr, Qərbi Ukrayna və Belorusiyadan imtina etmiş, həmçinin Cənubi Qafqazı Osmanlının nəzarətinə vermişdi. Türkiyənin, ardınca isə Almaniyanın dünya müharibəsində məğlub olmasından sonra Brest sülhündən çıxan Rusiya itirdiyi əraziləri, o cümlədən Cənubi Qafqazı təkrar ələ keçirmək niyyətini bəyan etdi.

1921-ci ildə -  Bakıda «Tənqid və təbliğ teatrı»nın (TTT) yaranması şəhərin mədəni həyatında əlamətdar hadisəyə çevrildi. 

1976-cı ildə - Qərbi Azərbaycanın Göyçə mahalının Nərimanlı kəndindən olan ustad aşıq, şair Bəhmən İbrahim oğlu Qarayev (Aşıq Bəhmən Göyçəli) (1901-1976) vəfat etmişdir.

1983-cü ildə - Azərbaycanın görkəmli teatr və kino aktyoru, Azərbaycan SSR Xalq Artisti Əliağa İsmayıl oğlu Ağayev (1913-1983) vəfat edib. 

1988-ci ildə - Ermənistanda türk-müsəlman əhaliyə qarşı kütləvi soyqırımların daha biri həyata keçirilib. Spitak rayonunun rəhbərliyinin (raykom katibi, milis rəisi, prokuror və s.) bilavasitə iştirakı ilə erməni silahlı dəstələri türk-müsəlman əhalinin evlərinə basqınlar ediblər. Basqın nəticəsində 40-dan çox türk-müsəlman əhali xüsusi vəhşiliklə qətlə yetirilib, yüzlərlə ailə ev-eşiyindən çölə atılaraq rayonu tərk etməyə məcbur edilib. Və buna rəğmən bir ay sonra (7 dekabr) Spitakda dəhşətli zəlzələ baş verəndə Azərbaycan Ermənistana birincilər sırasında yardım əlini uzatdı.