1181    

14/11/2017

1724-cü ildə - I Pyotr general-mayor Kropotova xüsusi əmr vermişdi. Əmrdə deyilirdi: "Erməni xalqı bizdən xahiş etmişdir ki, biz onları öz himayəmizə qəbul edib torpaqlar ayıraq, ona görə də sizə tapşrıram ki, əgər erməni xalqı bəyəndiyi yerdə yaşamaq istəsə, ona kömək edib ləyaqətlə qoruyun, elə rəftar edin ki, onlardan heç bir şikayət eşidilməsin, çünki biz burada erməni xalqını imperatorluq qayğısı ilə əhatə edib, öz himayəmizə götürmüşük".

1917-ci ildə - Mühəndis, alim, artilleriya general-leytenantı, pilotlu gəmilərin sınaq uçuşları üzrə dövlət komissiyasının sədri (1966-1991), sovet kosmik proqramının banilərindən biri Kərim Abbasəli oğlu Kərimov (1917-2003) Bakıda Pirşağı kəndində anadan olmuşdur. Uzun illər sovet kosmonavtikasının rəhbərlərindən biri, kosmik uçuşlar üzrə dövlət komissiyasının sədri olub. Lakin onun fəaliyyəti məxfi qrif altında olduğu üçün geniş ictimaiyyət azərbaycanlı general Kərimovu yalnız 90-cı illərdə tanıdı.

1967-ci ildə - "Arşın mal alan"da Soltan bəyin ilk ifaçısı kimi böyük şöhrət qazanmış və uzun illər həmin rolun ən yaxşı yaradıcısı olmuş aktyor, əməkdar artist, SSRİ dövlət mükafatı laureatı Ələkbər Hüseyn oğlu Hüseynzadə (1887-1967) Bakıda vəfat edib.

1991-ci ildə - Moskva yaxınlığında Novo-Oqaryovada yeddi respublika - Rusiya, Belarus, Azərbaycan, Qazaxıstan, Qırğızıstan, Tacikistan və Türkmənistan rəhbərləri yeni dövlətlərarası birlik - "Suveren Dövlətlər İttifaqı"nı yaratmaq haqqında niyyətlərini bildirdilər. Respublikalarda, o cümlədən Azərbaycanda demokratik qüvvələr buna qarşı qəti mübarizəyə qalxdılar. Hazırlanmış müqaviləyə M.Qorbaçovdan başqa heç kim imza atmadı.

2006-cı ildə - Brüsseldə Avropa Birliyi (AB) ilə Azərbaycan arasında Avropa Qonşuluq Siyasəti üzrə Fəaliyyət Planı imzalanıb. Sənədi Azərbaycan tərəfdən XİN başçısı Elmar Məmmədyarov imzalayıb. Beş il müddətinə nəzərdə tutulan sənəd Azərbaycanın AB ilə əməkdaşlığının bütün sahələrini əhatə edir. Avropa Qonşuluq Siyasəti AB-nin genişlənməsi kontekstində 2003-cü ildə qəbul edilmiş Avropa Təhlükəsizlik Strategiyası əsasında hazırlanıb. Sənədə AB-nin Aralıq dənizindən Qara dənizədək qonşuları, həmçinin 2004-cü ildən üç Cənubi Qafqaz ölkəsi daxil edilib.

2008-ci ildə - Bakıda IV Enerji sammiti keçirilib. 2007-ci ilin may və oktyabrında Krakov və Vilnüsdə, 2008-ci ilin mayında Kiyevdə keçirilmiş sammitlərin davamı olan Bakı toplantısında Xəzər-Qara dəniz-Baltik enerji tranziti məkanının yaradılması, bu istiqamətdə Odessa-Brodı neft kəmərinin işə salınması, "Nabucco" layihəsi (Xəzər və Mərkəzi Asiyadan qazın Azərbaycan və Türkiyə üzərindən Avropaya nəqli) və s. məsələlər müzakirə olunub. Sammitin yekunlarına dair 15 ölkə və Avropa Komissiyası tərəfindən Bəyannamə imzalanıb.