1166    

14/11/2017

1912-ci ildə - Çar Rusiyasının IV Dövlət Duması fəaliyyətə başlayıb. Dumada Cənubi Qafqaz müsəlmanlarının yeganə nümayəndəsi Məmmədyusif Cəfərov idi. IV Dövlət Duması səlahiyyət müddətini axıradək işlədi, sonuncu iclas 1917-ci il oktyabrın 19-da keçirildi. Bir həftə sonra Peterburqdakı bolşevik üsyanı (Oktyabr inqilabı) ilə Rusiya imperiyası süqut etdi.

1917-ci ildə - Zaqafqaziya Komissarlığı yaradıldı. Onun tərkibinə Gürcüstandan Y.Gegeçqori (sədr) və A.Çxenkeli, Azərbaycandan F.X.Xoyski, M.Y.Cəfərov,  X.Məlikaslanov,  ermənilərdən  T.Ter-Qazaryan,  X.Karçikyan, A.Aqacanyan, sağ eserlərdən D.Donskoy daxil oldular.

1918-ci ildə - Hərbi Nazirliyin təşkili barədə Azərbaycan Xalq Cümhuriyyəti hökumətinin qərarından iki həftə sonra ordunun Ümumi Qərargahının təsis edilməsi barədə Səməd bəy Mehmandarovun müvafiq əmri imzalandı. Onun tərkibi ləvazimat, mühəndis, növbətçi general, general-kvartirmeyster, topçu, topoqrafiya, tibb, hərbi təhsil və nəzarət şöbələrindən ibarət idi. Bu şöbələrin başçıları vəzifələrinə milli qoşun hissələrinin yaradılmasında artıq kifayət qədər xidmətləri olan zabitlər təyin edildilər: polkovnik H.Səlimov - Ümumi Qərargah və dəftərxananın, polkovnik Qaytabaşı - növbətçi general, polkovnik Seyfulla Mirzə - ləvazimat; general-mayor Tlexas - topçu şöbələrinin rəisləri, general-mayor Usubov hərbi təhsil şöbəsinin rəisi və qoşunlarda atıcılıq işinin müfəttişi oldular. 

1919-cu ildə - Azərbaycan Xalq Cümhuriyyətinin ilk ali təhsil ocağı - Bakı Dövlət Universiteti fəaliyyətə başlayıb. Universitetin açılması barədə qərar 1919-cu il sentyabrın 1-də Cümhuriyyətin parlamenti tərəfindən qəbul edilmişdi.

1927-ci ildə - Xalq artisti, baletmeyster, Azərbaycan Dövlət Rəqs Ansamblının yaradıcısı, pedaqoq Xumar Rza qızı Zülfüqarova (1927-2017) Bakı şəhərində görkəmli teatr və kino aktyoru Rza Əfqanlının ailəsində anadan olmuşdur.

1991-ci ildə - Ali Sovetin sessiyasında "Azərbaycan Respulikasının dövlət müstəqilliyi haqqında" Konstitusiya Aktı ilə bağlı ümumxalq səsverməsinin keçirilməsi barədə qərar qəbul olunub. Referendum 1991-ci il dekabrın 29-na təyin edilib.

1994-cü ildə - Milli Məclis ARDNŞ-lə xarici şirkətlər konsorsiumu arasında bağlanmış "Əsrin müqaviləsi"ni (20 sentyabr 1994) ratifikasiya edib. Müqavilədə Xəzərin Azərbaycan sektorundakı "Azəri", "Çıraq" və "Günəşli" yataqlarının birgə işlənməsi və hasilatın pay bölgüsü əksini tapıb.

2002-ci ildə - Milli Məclis 91 səs lehinə, 1 səs əleyhinə olmaqla Azərbaycan hərbçilərinin Əfqanıstandakı sülhyaratma missiyasında iştirakına razılıq verib. Noyabrın 19-da 30 nəfərlik Azərbaycan taqımı Əfqanıstana yola düşdü və Türkiyə sülhməramlı kontingenti tərkibində fəaliyyətə başladı. Bu, Kosovodan sonra Azərbaycan hərbçilərinin iştirak etdiyi ikinci sülhməramlı missiya idi.