1131    

16/11/2017

1603-cü ildə - Növbəti Səfəvi-Osmanlı müharibəsi (1603-1612) gedişində I Şah Abbasın qoşunları İrəvan qalasını mühasirəyə alıblar. Tərəflər arasındakı öncəki müharibədə (1558-1590) Azərbaycanın böyük hissəsini, o cümlədən İrəvan Osmanlının nəzarətinə keçmişdi. Səfəvi qüvvələri İrəvanı uzun müddət mühasirədən saxladıqdan sonra, 1604-cü ilin iyununda ələ keçirə bildilər. İrəvanın idarəçiliyi Səfəvi hakimiyyətinin aparıcı tayfalarından olan Qacarların nümayəndəsi Əmirgünə xan Qacara verilib.

1918-ci ildə - Azərbaycan Xalq Cümühriyyətinin müvəqqəti parlamenti - Milli Şura beş aylıq fasilədən sonra yenidən toplanıb. Baş nazir F.Xoyskinin təklifi ilə toplanan Milli Şura Xalq Cümhuriyyətinin yeni parlamentinin təşkili barədə qərar qəbul edib. Seçki qanununun hazırlanması və parlamentin çağırılmasına dair digər hazırlıq işləri ilə bağlı Milli Şuranın sədri M.Rəsulzadənin sədrliyi ilə komissiya yaradılıb. Bu zaman F.X.Xoyski əsil diplomat məharəti nümayiş etdirdi, V.M.Tomsona məktubla müraciət edərək, ingilis qoşunlarının Bakıya girməsinin Azərbaycanın dövlət müstəqilliyi və ərazi bütövlüyünə xələl gətirməyəcəyinə ümidvar olduğunu bildirdi. 

1920-ci ildə - V.İ.Lenin Qafqazda olan İ.V.Stalindən 1920-ci il noyabrın 13-də teleqramla soruşmuşdu: "Bakının ətrafını möhkəmləndirmək üçün tam ciddiyyətlə iş görülmür?" Bu teleqrama İ.V.Stalinin 1920-ci il noyabrın 16-da göndərdiyi cavab məktubunda deyilirdi: "Bakının fəal müdafiə yolu ilə təsadüflərdən qorunmasını təmin etmək üçün ən azı beş diviziya lazımdır. "Şübhəsiz, düşmən elə ilk hücumdaca Yelizavetpolu (Gəncəni) tutacaq, bu isə ona on səkkizinci ildəkinə bənzər Azərbaycan burjua hökuməti yaratmağa və Bakının ələ keçirilməsini təmin etməyə imkan verəcək". 

1938-ci ildə - Teatr aktyoru, teatr və kino rejissoru, kino redaktoru, Azərbaycan SSR Əməkdar Artisti və Xalq Artisti Abbas Mirzə Mirzə Əbdülrəsul oğlu Şərifzadə (1893-1938) repressiyanın qurbanı oldu və güllələndi. 

1994-cü ildə - Azərbaycanla Əfqanıstan arasında diplomatik münasibətlər qurulub.

1999-cu ildə - ATƏT-in Daimi Şurasında təşkilatın Bakıda daimi nümayəndəliyinin yaradılması haqqında 318 saylı qərar qəbul olunub. ATƏT-in Bakı Ofisi 2000-ci il iyulun 18-də fəaliyyətə başladı.