1134    

20/11/2017

1918-ci ildə - Qanunların hazırlanması üzərində işləyən müvafiq komissiyanın təqdim etdiyi layihə - Azərbaycan parlamentinin yaradılması haqqında qanun Milli Şura tərəfindən qəbul edildi. 

1920-ci ildə - Azərbaycan SSR-də "Yoxsul komitələri haqqında" yeni dekret qəbul olundu. Həmin dekretdə yoxsul komitələrinin konkret, təxirəsalınmaz mübariz vəzifələri göstərilmişdi. "Qolçomaqların və əksinqilabi ünsürlərin yoxsul komitələrinə daxil olmasına yol verməmək məqsədi daşıyan" xüsusi komissiyalar yaradılırdı. Beləliklə, elə bu dekretin timsalında demək olar ki, hələ o zaman Mərkəzin göstərişi ilə Azərbaycan kəndində yeni dövlət hakimiyyətinin tətbiqinə yuxarıdan təzyiqlə başlanmışdı.

1945-ci ildə - Təbrizdə Seyid Cəfər Pişəvərinin rəhbərliyi altında başlanan milli-azadlıq hərəkatı həlledici mərhələyə qədəm qoyub - Azərbaycan Xalq Konqresi yaradılıb. Konqress Cənubi Azərbaycanda parlament seçkilərinin keçirilməsi barədə qərar qəbul edib.

1954-cü ildə - Hərbi və siyasi xadim, İkinci dünya müharibəsində Аzərbаycаn lеgiоnunun bаşçısı, ABŞ-ın "Аzаdlıq" rаdiоsunun Аzərbаycаn rеdаksiyаsının bаş rеdаktоru Əbdürrəhman bəy Fətəlibəyli-Düdənginski (1908-1954) Münhenin “Alpenplate-6” meydanındakı bir mənzildə qətlə yetirilmişdi.

1956-cı ildə - Görkəmli sənətkar, Azərbaycan Respublikasının Xalq artisti, aktyor Kazım Cəfər oğlu Kazımzadə (1896-1956) Bakıda vəfat etmiş, Fəxri Xiyabanda dəfn olunmuşdur.

1960-cı ildə - Azərbaycanın Milli Qəhrəmanı, Qarabağ müharibəsi şəhidi Gültəkin Məlik qızı Əsgərova (1960-1992) Bakı şəhərində anadan olub.

1983-cü ildə - Görkəmli  ədəbiyyatşünas alim, akademik, professor, əməkdar elm xadimi Həmid Məmmədtağı oğlu Araslı (1909-1983) Bakıda vəfat etmişdir. Bakıdakı küçələrdən biri onun adını daşıyır.

1991-ci ildə - Erməni silahlı qüvvələri Qarabağ münaqişəsi gedişində Azərbaycana qarşı ən böyük terror aktını həyata keçiriblər. Xocavənd (Martuni) rayonunun Qarakənd kəndinin səmasında içərisində Azərbaycanın dövlət və hökumət rəhbərlərinin olduğu "Mi-8" vertolyotu raketlə vurulub. Vertolyotda olan 22 nəfərin hamısı, o cümlədən dövlət katibi, akademik Tofiq Kazım oğlu İsmayılov, baş prokuror İsmət İsmayıl oğlu Qayıbov, dövlət müşaviri Məhəmməd Əsədov, baş nazirin müavini Zülfü Hacıyev, SSRİ xalq deputatları Vaqif Cəfər oğlu Cəfərov, Vəli Hüseyn oğlu Məmmədov, Prezident Aparatının şöbə müdiri Osman Mirzəhüseyn oğlu Mirzəyev, DQMV prokuroru V.Plavski, Dağlıq Qarabağ münaqişəsi regionunda Rusiya və Qazaxıstanın müşahidəçilər qrupunun rəhbərləri, jurnalistlər və vertolyotun heyət üzvləri həlak olmuşdu. Faciə ilə bağlı Azərbaycan ərazisində üçgünlük (21-23 noyabr) matəm elan edilib. Qarakənd terroru Ermənistan-Azərbaycan münaqişəsinin sülh yolu ilə həllinə dair iki ay öncə Jeleznovodskda əldə edilmiş razılaşmanın sonu oldu və münaqişə tam hərbi müstəviyə qədəm qoydu.