1047    

21/11/2017

1908-ci ildə - Qırmızı Əmək Bayrağı Ordeni və medallarla təltif edilmiş, Əməkdar elm xadimi, SSRİ-nin Fəxri neftçisi fəxri adını almış akademik Səftər Mehdi oğlu Quliyev (1908-1973) Bakıda anadan olmuşdur.

1926-cı ildə - Ədəbiyyatşünas, publisist, filologiya elmləri doktoru Nadir İbrahim oğlu Vəlixanov (1926-1994) Şuşa şəhərində anadan olmuşdur.

1972-ci ildə - Azərbaycanın Milli Qəhrəmanı, Qarabağ müharibəsi şəhidi Mehman Rəşid oğlu Sayadov (1972-1992) Qərbi Azərbaycanın Vardenis rayonunun Günəşli kəndində anadan olmuşdur.

1992-ci ildə - Naxçıvan şəhərində Yeni Azərbaycan Partiyasının təsis konfransı keçirilib. Təsis konfransında partiyanın məramnamə və nizamnaməsi qəbul olunub, rəhbər orqanları seçilib. Naxçıvan Ali Məclisinin sədri Heydər Əliyev açıq səsvermə əsasında yekdilliklə partiyanın sədri seçilib. Təsis konfransında Azərbaycan xalqına müraciət qəbul olunub. Müraciətdə Yeni Azərbaycan Partiyasının xalqı və ölkəni düşdüyü böhran vəziyyətindən xilas etmək əzmi vurğulanırdı. YAP Azərbaycanın siyasi müstəvisinə daxil oldu və bir il keçməmiş ölkənin hakim partiyasına çevrildi.

1994-cü ildə - "Əhalinin Sosial Müdafiəsi Fondu" təsis olundu. Bu fonda bütün müəssisələr balans mənfəətindən 1 faiz məcburi ayırma verməyə başladı. Fond bütün təşkilatlardan sosial sığorta ayırmaları toplayır və yaranan vəsait hesabına pensiya və müavinətləri maliyyələşdirirdi.

2002-ci ildə - Praqada keçirilən NATO sammiti çərçivəsində Azərbaycan və Ermənistan prezidentlərinin növbəti görüşü keçirilib. Bu, Heydər Əliyev və Robert Koçaryan arasında 1999-cu ildə başlanan görüşlər seriyasının sonuncusu (20-ci) idi. Prezidentlər görüşdə hər hansı nəticə əldə olunmadığını bildiriblər. Noyabrın 22-də Avroatlantika Tərəfdaşlıq Şurasının iclasında çıxış edən prezident Heydər Əliyev beynəlxalq birliyi, o cümlədən NATO-nu Azərbaycanın məruz qaldığı işğala laqeyd münasibət göstərməməyə çağırıb.

2008-ci ildə - İstanbulda Türkiyə, Azərbaycan, Qazaxıstan və Qırğızıstan parlament nümayəndə heyətlərinin ikigünlük görüşünün yekunu olaraq Türkdilli Ölkələrin Parlament Assambleyası təsis edilib. Bununla bağlı dörd ölkənin parlament rəhbərləri tərəfindən Birgə bəyannamə imzalanıb. Bəyannamənin digər türkdilli dövlətlər üçün açıq olduğu elan edilib. Parlament Assambleyasının təşkili ilə bağlı məsələlərin 2009-cu ildə Bakıda keçiriləcək toplantıda həll olunması qərara alınıb.