1078    

25/11/2017

1917-ci ildə - Ümumrusiya Müəssislər Məclisinə seçkilər keçirilib. Cənubi Qafqazda 15 partiyanın qatıldığı seçkidə Azərbaycanda "Müsavat", Gürcüstanda menşevik, ermənilər arasında isə "Daşnaksütyün" partiyaları üstünlük (ümumilikdə 73 faiz) qazanıblar. Bolşeviklər Cənubi Qafqaz üzrə cəmisi 4,4 faiz, Bakıda 20 faiz səs toplayıblar. Ümümrusiya miqyasında da umduqları nəticəni əldə edə bilməyən bolşeviklər Müəssislər Məclisinin çağırılmasına imkan vermədilər. Nəticədə Cənubi Qafqazdan seçilmiş deputatlar (o cümlədən 44 azərbaycanlı deputat) Zaqafqaziya Seymini (fevral 1918) təşkil etdilər.

1946-cı ildə - Azərbaycan xalq rəssamı, Azərbaycan Rəssamlar İttifaqının sədri Fərhad Qurban oğlu Xəlilov anadan olmuşdur.

1954-cü ildə - Filologiya elmləri doktoru, professor, AMEA-nın Akademik Z.M.Bünyadov adına Şərqşünaslıq İnstitutunun direktoru, Milli Məclisin deputatı, AMEA-nın həqiqi üzvü Gövhər Ağabala qızı Baxşəliyeva Bərdə şəhərində anadan olmuşdur.

1968-ci ildə - Azərbaycanın Milli Qəhrəmanı Şahlar İsa oğlu Hüseynov (1968-1992) Qərbi Azərbaycanın Razdan rayonunun Hankavan kəndində anadan olmuşdur. 

1991-ci ildə - Ali Sovetin sessiyasında Dağlıq Qarabağ Muxtar Vilayətinin ləğv edilməsi barədə qərar qəbul olunub. Qərar ermənilərin qondarma dövlət - "Dağlıq Qarbağ Respublikası" yaratmaq qərarına (2 sentyabr 1991) cavab olaraq qəbul edilmişdi. Ali Sovet keçmiş DQMV-nin mərkəzi Stepanakertin adının dəyişdirilərək Xankəndi adının bərpa olunması, habelə Mardakert və Martuninin tarixi adlarının (Ağdərə və Xocavənd) bərpası barədə qanun qəbul edib. Dağlıq Qarabağda Hadrut və Əsgəran rayonları ləğv edilib, Hadrutun ərazisi Xocavənd rayonunun tərkibinə, Əsgəranın ərazisi isə yeni yaradılan Xocalı rayonunun tərkibinə verilib.

1991-ci ildə - Ali Sovetin iclasında həmçinin parlamentin daimi fəaliyyət göstərəcək orqanının - Milli Şuranın yaradılması barədə qərar qəbul edilib. 50 nəfərlik Milli Şura müxalifət və iqtidar ("demblok" və "komblok") deputatlarından paritet əsasda (25-25) formalaşdı. 1992-ci ilin mayından Milli Məclis adlanan qanunverici orqan 1995-ci ilədək Ali Sovetin funksiyasını yerinə yetirdi.