1073    

30/11/2017

1918-ci ildə - Bakıda faktiki hakimiyyəti ələ almış ingilis qoşunlarının komandanı general Tomson Xəzər donanmasının ticarət gəmilərinin ingilis komandanlığının sərəncamına keçməsi barədə əmr verib. Bu məqsədlə mayor Braunun rəhbərliyi ilə "İngilis dəniz ticarəti" şirkəti yaradılıb. Bundan öncə general Tomson özünü Bakının general-qubernatoru elan etmiş və Bakı quberniyasında bütün idarəçiliyin ingilis hərbi komandanlığına verilməsi barədə əmr imzalamışdı. Polkovnik Kokkerel müttəfiq (Antanta) qüvvələrinin Bakıdakı polis komissarı təyin edilmişdi.

1988-ci ildən etibarən - Beynəlxalq informasiya təhlükəsizliyi günü qeyd olunur.

1990-ci ildə - Erməni təxribatçı dəstələrinin Xankəndi aeroportu (1991-ci ildə Xocalı aeroportu adlandırıldı) yaxınlığında sərnişin avtobusunu partlatması nəticəsində 2 azərbaycanlı həlak olub 11 nəfər yaralanıb.

2001-ci ildə - Moskvada MDB dövlət başçılarının sammiti çərçivəsində Azərbaycanla Qazaxıstan arasında Xəzərin dibinin orta xətt prinsipi üzrə bölünməsinə dair dövlətlərarası saziş imzalanıb. Sənədi prezidentlər Heydər Əliyev və Nursultan Nazarbayev imzalayıblar. 2002-ci ildə Azərbaycanla Rusiya arasında analoji sənəd imzalandı, 2003-cü ildə isə üç ölkə arasında Xəzərin sektoral bölgüsünə dair yekun razılaşma əldə edildi.