1087    

08/12/2017

1795-ci ildə - General Savelyevin başçılıq etdiyi çar Rusiyası qoşunları Dərbənd istiqamətində Azərbaycan ərazisinə soxulublar. Rusiya qoşunları bir ay ərzində Gəncəyədək irəlilədikdən sonra geri qayıdıblar. Bunun ardınca 1796-cı ilin yazında general V.Zubovun başçılığı altında rus qoşunları yenidən Azərbaycanın şimal torpaqlarına hücum ediblər, Dərbənd şəhəri ruslar tərəfindən işğal olunub. Həmin il çar II Yekaterinanın vəfatından sonra rus qoşunları geri qayıtdılar. Bu, Azərbaycan torpaqlarının Rusiya imperiyası tərəfindən işğalına (1801-1828) hazırlıq yürüşləri idi.

1897-ci ildə - Tanınmış alim, Azərbaycanın ilk epidemioloqu, tibb elmləri doktoru İsmayıl Əbdülxalıq oğlu Axundov (1897-1952) Şamaxıda anadan olub. Almaniyada təhsil aldıqdan və bir müddət orada işlədikdən sonra 1929-cu ildə Azərbaycana qayıdıb və respublikada epidemiologiya elmi məktəbinin əsasını qoyub. 

1903-cü ildə - Maarifçi, pedaqoq, şair, publisist, mütəfəkkir Məhəmməd Tağı Kərbəlayi Səfər oğlu Səfərov (1854-1903) vəfat edib. 

1919-cu ildə - Fəhlə klubları və digər belə təşkilatlar müstəqil milli dövlətçilik əleyhinə aparılan təşviqat işinin ocaqlarına və onların partiya yığıncaqlarının keçirildiyi isti yuvalara çevrildiyi üçün Azərbaycan Xalq Cümhuriyyəti hökuməti bu fəaliyyətin qarşısını almaq üçün tədbirlər görməyə məcbur oldu. Dəfələrlə edilmiş xəbərdarlıqlardan sonra hökumətin göstərişinə əsasən, daxili işlər naziri Bakıda mövcud olan bütün fəhlə klublarının bağlandığı haqqında sərəncam verdi. Buna cavab olaraq, Fəhlə Konfransının Rəyasət heyəti ertəsi günə nəzərdə tutulan etiraz tətilinə çağırışla çıxış etmiş və hökumət orqanlarını Mərkəzi Fəhlə Klubu binasını açmağa məcbur etmişdi.

1922-ci ildə - 2-ci çağırış Azərbaycan MİK-in İkinci sessiyası Zaqafqaziya federasiyasının vahid sovet respublikaları İttifaqına daxil olmasını bəyəndi və Azərbaycan MİK-in bu istiqamətdə gördüyü bütün tədbirləri təsdiq etdi. 

1963-cü ildə - Aktyor, rejissor, ssenarist, Azərbaycanın əməkdar incəsənət xadimi Lətif Bəşir oğlu Səfərov (1920-1963) intihar edib. O, müğənni Şövkət Ələkbərovanın həyat yoldaşı olmuşdur.

1973-cü ildə - Azərbaycanın xalq artisti, Azərbaycan Dövlət Musiqili Komediya Teatrının yaradıcılarından biri olan aktyor Lütfəli Əmir oğlu Abdullayev (1914-1973) Bakı şəhərində vəfat edib. 

1989-cu ildə - Azərbaycan Xalq Cəbhəsi müşavirəsində İdarə Heyəti buraxıldı. Onun səlahiyyətlərini yerinə yetirən, əslində "radikallar"dan ibarət Müvəqqəti Təşkilat Qrupu seçildi, "radikallar" daha da fəallaşdı. Onlar narazılığı artan xalq kütləsini öz ardınca apardı. Bir çox bölgələrdə əsl ikihakimiyyətlilik - kommunistlərin və cəbhəçilərin hakimiyyəti yaranmışdı. AXC təşkilatlarında dövlət funksiyalarını yerinə yetirən strukturlar meydana gəlmişdi.

1991-ci ildə - Azərbaycanın Milli Qəhrəmanı, Qarabağ müharibəsi iştirakçısı Rizvan Rəhman oğlu Teymurov (1967-1991) Kərkicahan ətrafında gedən qanlı döyüşlərdə şəhid olub. 

1992-ci ildə - Ermənistan silahlı qüvvələri atəşkəs barədə Soçi razılaşmasını (sentyabr) pozaraq Zəngilan rayonunun sərhəd kəndlərinə hücuma başlayıblar. Üç gün sürən döyüşlər nəticəsində erməni qüvvələri rayonun 8 kəndini işğal ediblər. Ermənilərin bu ərazidə möhkəmlənməsi 1993-cü ilin payızında Zəngilan rayonunun işğalında mühüm rol oynadı.