1179    

11/12/2017

1905-ci ildə - Çar II Nikolay Rusiya Dövlət Dumasına seçkilər barədə fərman verib. Duma 1906-cı il aprelin 27-də işə başladı. Azərbaycanda seçkilər mayın 31-də keçirildi və beş azərbaycanlı Dumanın deputatı seçildi.

1918-ci ildə - Xalq yazıçısı, ictimai xadim Bayram Salman oğlu Bayramov (1918-1994) anadan olub. Qarabağa Xalq Yardımı Komitəsinə rəhbərlik edib.

1919-cu ildə - "Müsavat" Partiyasının II qurultayı MK sədri M.Ə.Rəsulzadə, MK üzvləri H.Ağayev, M.H.Hacınski, Ş.Rüstəmbəyov və M.Hacınski olmaqla partiyanın Mərkəzi Komitəsini seçdikdən sonra öz işini başa çatdırdı. 

1923-cü ildə - Azərbaycan K(b)P MK Rəyasət Heyəti Naxçıvan diyarının Naxçıvan Muxtar Respublikasına çevrilməsi məsələsini müzakirə edərək, Azərbaycan MİK-ə təklif etdi ki, Naxçıvan Muxtar Respublikasının yaradılması barədə məsələni Zaqafqaziya MİK qarşısında qaldırsın. Azərbaycan K(b)P MK-nın Rəyasət Heyəti "Dağlıq Qarabağ Muxtar Vilayətinin Əsasnaməsi" ilə də tanış olub, onun yenidən işlənməsi üçün komissiya yaratdı, 9 nəfərdən ibarət Qarabağ vilayət partiya komitəsini təsdiq etdi.   

1941-ci ildə - SSRİ Ali Soveti Rəyasət Heyətinin Fərmanı ilə İsrafil Məmmədova Sovet İttifaqı Qəhrəmanı adı verildi. İsrafil Məmmədov xalqını, millətini ucaldan ilk azərbaycanlı Sovet İttifaqı Qəhrəmanı idi. 

1988-ci ildə - Ermənistandakı zəlzələdən (7 dekabr) sonra bu ölkəyə ilk yardım edənlərdən biri Azərbaycan olub. Lakin erməni tərəfi xislətinə sadiq qalaraq Azərbaycan təyyarəsini qəbul etməyib. Leninakan (Gümrü) hava limanında dispetçerlər tərəfindən yanlış istiqamətləndirilən "İl-76" təyyarəsi müəmmalı şəkildə dağa dəyərək partlayıb, 63 nəfər xilasedici (ehtiyatda olan hərbçi) və 9 ekipaj üzvü həlak olub. Bir nəfər xilas olsa da, ömürlük şikəst qalıb. Buna rəğmən Azərbaycandan Ermənistana qatarla humanitar yardım və 150 nəfərinşaatçı göndərildi. Dağıdıcı zəlzələ (25 minədək adam ölmüşdü) ilə dünyanın diqqətini özünə cəlb edən Ermənistan azərbaycanlıların deportasiyasını başa çatdırdı, dünya isə bunu "görmədi". 

1991-ci ildə - Xalq Cəbhəsinin təzyiqi ilə general-leytenant Valeh Bərşadlı müdafiə naziri vəzifəsindən azad edilib, onun yerinə respublikanın hərbi komissarı Tacəddin Mehdiyev təyin edilib. İki aya yaxın nazir olan T.Mehdiyev isə "Daşaltı faciəsi" (26 yanvar 1992) ilə yadda qaldı.

1991-ci ildə - Rumıniya Türkiyədən sonra Azərbaycanın müstəqilliyini tanıyan ikinci ölkə olub. İki ölkənin diplomatik əlaqələri 1992-ci il iyunun 21-də quruldu.

1993-cü ildə - Azərbaycanın Milli Qəhrəmanı, Qarabağ müharibəsi iştirakçısı Elşad Saday oğlu Əhədov (1968-1993) Ağdaş yüksəkliyi uğrunda gedən döyüşdə şəhid oldu. 

2003-cü ildə - Cenevrədə keçirilən "İnformasiya Cəmiyyəti üzrə Dünya Sammiti"ndə Azərbaycan prezidenti İlham Əliyevlə Ermənistan rəhbəri Robert Koçaryan arasında ilk görüş olub.