1371    

19/12/2017

1897-ci ildə - Azərbaycan siyasi xadimi, Sovet rejiminə qarşı Azərbaycan müqavimət hərəkatının başçılarından biri, Azərbaycanın dövlət müstəqilliyinin bərpa edilməsi uğrunda mübarizə aparmış şəxs Dadaş Əbdül Hüseyn oğlu Həsənov (1897-1927) Şuşa şəhərində tacir ailəsində doğulmuşdur.

1921-ci ildə - Boyakar, qrafik və teatr rəssamı, SSRİ xalq rəssamı, SSRİ Rəssamlıq Akademiyasının akademiki, Cəvahirləl Nehru adına beynəlxalq mükafatın, Azərbaycan SSR dövlət mükafatı laureatı Mikayıl Hüseyn oğlu Abdullayev (1921-2002) anadan olub.

1934-cü ildə - Azərbaycan EA-nın həqiqi üzvü, Ali Attestasiya Komissiyasının sədri, fizika-riyaziyyat elmləri doktoru, “Şöhrət” ordeni ilə təltif edilmiş Beynəlxalq mühəndis akademiyasının həqiqi üzvü, Amerika astronavtika və aeronavtika institutunun üzvü Arif Şəfaət oğlu Mehdiyev (1934-2016) Bakı şəhərində anadan olmuşdur.

1943-cü ildə - Bəstəkar, əməkdar incəsənət xadimi, dosent, professor Fərəc Qara oğlu Qarayev Bakıda anadan olub. 

1962-ci ildə - Yazıçı, şair, Azərbaycan Yazıçılar Birliyinin üzvü, "Qızıl qələm" mükafatı laureatı Elxan Elatlı (Elxan Əbdürrəhman oğlu Osmanov) Şamaxı rayonunun Sis kəndində anadan olub.

1982-ci ildə - 1965-1981-ci illərdə Azərbaycan SSR Müdafiə Qərargahının rəisi olmuş, Xidmətlərinə görə 2 “Qırmızı Ulduz”, “Şərəf nişanı” ordenləri və medallarla təltif olunmuş general-mayor Mustafa Qurban oğlu Nuriyev (1923-1982) Bakıda vəfat etmişdir.

1990-cı ildə - Azərbaycan Xalq yazıçısı, Əməkdar incəsənət xadimi, kino-dramaturq və tərcüməçi, nasir Ənvər Qafar oğlu Məmmədxanlı (1913-1990) vəfat edib. 

1991-ci ildə - Azərbaycanla Ermənistan arasında dəmir yolu nəqliyyatı tamamilə dayandırılıb. Azərbaycan bu məcburi addımı Ermənistan tərəfin Mehri rayonu ərazisində qatarlara mütəmadi hücumların edilməsinə cavab olaraq atmışdı. Bu ərazidə Bakı-Naxçıvan marşrutu ilə hərəkət edən qatarlara basqınlar hələ 1989-cu ildə başlamış və o vaxtdan dəmir yolunda hərəkət dəfələrlə kəsilmişdi. Əslində ermənilər bunda maraqlı idilər, çünki Azərbaycan-Ermənistan dəmir yolu əlaqəsinin dayandırılması nəticə etibarilə Naxçıvanı ağır iqtisadi blokadaya saldı. Eyni zamanda, ermənilər bu faktdan sui-istifadə edərək 1992-ci ildə ABŞ Konqresində Azərbaycana qarşı 907 saylı qadağanın qəbuluna nail oldular.

1993-cü ildə - Heydər Əliyev Azərbaycan prezidenti postunda ilk rəsmi səfərini Fransaya edib. Səfər AXC iqtidarı dövründə soyuqlaşmış Azərbaycan-Fransa münasibətlərinin sahmanlanması üçün böyük önəm kəsb edirdi. Heydər Əliyev səfər gedişində Fransada yaşayan azərbaycanlı icmasının nümayəndələri ilə də görüşmüş, Parisdəki Sen-Klu qəbirstanlığında Azərbaycan xalqının görkəmli oğullarının - Əlimərdan bəy Topçubaşovun və Ü.Hacıbəyovun qardaşı Ceyhun Hacıbəylinin məzarlarını ziyarət etmişdi.