1365    

19/12/2017

1918-ci ildə - Andronikin quldur  dəstələrinin  Qarabağda və Zəngəzurda törətdikləri özbaşınalıqlar və qanlı hadisələr barədə ayrıca məsələ Azərbaycan parlamentinin fövqəladə iclasında müzakirə olundu. Hökumətin gördüyü tədbirlər haqqında F.X.Xoyskinin çıxışı və onun müzakirəsindən sonra parlament Azərbaycanın ərazi bütövlüyünün qorunması və təcavüzə məruz qalmış əhaliyə mənəvi və maddi yardımın göstərilməsi istiqamətində aparılan işlərin gücləndirilməsi barədə qərar qəbul etdi.

1929-cu ildə - Sankt-Peterburq Tibb Cərrahlıq Akademiyasının məzunu, tanınmış həkim, "Difai" təşkilatının Şuşa şöbəsinin sədri Kərim bəy Mirzə Mustafa bəy oğlu Mehmandarov (1854-1929) vəfat edib.

1956-cı ildə - Maarif xadimi, pedaqoq-alim, yazıçı, tərcüməçi Rəcəb Əsədulla oğlu Əfəndizadə (1893-1956) vəfat edib. 

1956-cı ildə - Azərbaycanın Milli Qəhrəmanı Riad Fikrət oğlu Əhmədov (1956-1992) Bakı şəhərində ziyalı ailəsində anadan olub. 

1958-ci ildə - Azərbaycanın Milli Qəhrəmanı İbrahim İsmayıl oğlu Məmmədov (1958-1994) Naxçıvanda dünyaya gəlmişdir.

1991-ci ildə - Ali Sovetin Milli Şurası "Azərbaycan Respublikasının Müstəqil Dövlətlər Birliyinə münasibəti haqqında" qərar qəbul edib. Qərarda bildirilirdi ki, Azərbaycan Respublikasının "indiki vəziyyətdə MDB-yə qoşulması" məqsədəuyğun sayılmır. Bununla belə, prezident A.Mütəllibov dekabrın 21-də Almatıda keçirilən sammitdə MDB-nin təsis olunması barədə sazişə imza atmışdı. Sənəd Milli Şura tərəfindən ratifikasiya olunmadı və yalnız 1993-cü ilin sentyabrında parlament Azərbaycanın MDB-yə üzvlüyünə razılıq verdi.

1991-ci ildə - keçmiş SSRİ respublikalarından birinci olaraq Litva Azərbaycanın müstəqilliyini tanıyıb. İki ölkə arsında diplomatik münasibətlər isə xeyli sonra, 1995-ci il noyabrın 20-də quruldu. 

1993-cü ildə - Parisdə rəsmi səfərdə olan prezident Heydər Əliyev Azərbaycanın ATƏM-in (1995-ci ilədək ATƏT belə adlanırdı) əsas sənədlərindən olan "Yeni Avropa üçün Paris Xartiyası"na qoşulması barədə sənədi imzalayıb. Avropada yeni geosiyasi reallıqları əks etdirən sənəd 1990-cı ildə ATƏM-in Paris sammitində qəbul olunmuşdu.

1994-cü ildə - ATƏT-in Budapeşt sammitinin (5-6 dekabr 1994) nəticələrinə əsasən, Vyanada Ermənistan-Azərbaycan, Dağlıq Qarabağ münaqişəsi üzrə təşkilatın Yüksək Səviyyəli Planlaşdırma Qrupu təsis olunub. ATƏT-ə üzv ölkələrin təyin etdiyi hərbi nümayəndələrdən ibarət olan bu təsisat Ermənistan-Azərbaycan münaqişəsi regionunda atəşkəsə riayət olunmasına nəzarət edir.   

2014-cü ildə - Xalq rəssamı, Əməkdar incəsənət xadimi, 1999-cu ildə “Şöhrət”, 2011-ci ildə “Şərəf” ordenləri və 2014-cü ildə Azərbaycan Respublikasının Dövlət mükafatı ilə təltif edilmiş, Azərbaycan Respublikası Prezidentinin fərdi təqaüdçüsü olmuş Oqtay Seyid Hüseyn oğlu Sadıqzadə (1921-2014) Bakı şəhərində vəfat etmişdir.