1460    

30/12/2017

1904-cü ildə - Bakıda fəhlələrin ümumi tətili neft sənayeçiləri ilə fəhlələr arasında "müştərək müqavilə"nin imzalanması ilə nəticələnib. "Mazut konstitusiya"sı adı ilə məşhur olan bu müqavilə bolşeviklərin dekabrın 27-də imzaladıqları sazişin şərtlərinə əlavə olan aşağıdakı maddələri nəzərdə tuturdu: tətil günləri üçün fəhlələrə əmək haqqı ödənilməsi; fəhlələrə mənzil, kerosin, neft və su verilməsi; əmək qabiliyyətini itirənlər üçün 3 ay müddətində əmək haqqının yarısının saxlanması; tətilçilərin cəzalandırılmayacağına təminat verilməsi. 

1906-cı ildə - Qacar hökmdarı Müzəfərəddin şah Konstitusiyanın qüvvəyə minməsi barədə fərman verib və Qacarlar İranı konstitusiyalı monarxiyaya çevrilib. Şah ölkədə inqilab dalğasını səngitmək üçün Konstitusiyanın qəbuluna razılıq vermişdi. Bu, Səttarxanın başçılıq etdiyi inqilabın (1905-1911) ilk mühüm uğuru idi.

1922-ci ildə - Moskvada I Ümumittifaq Sovetlər qurultayında RSFSR, Ukrayna SSR, Belorusiya SSR və üç Cənubi Qafqaz respublikasının birləşdiyi ZSFSR-in təsisçiliyi ilə ittifaq dövləti - SSRİ yaradılıb. Qurultayda SSRİ-nin ilk ali idarəetmə orqanı - 18 nəfərlik Mərkəzi İcraiyyə Komitəsi (sədr M.Kalinin) seçilib. "Zaqfederasiya"dan SSRİ rəhbərliyinə Nəriman Nərimanov seçilib.

1926-cı ildə - Əməkdar artist, Xalq artisti, xanəndə Əbülfət Əsəd oğlu Əliyev (1926-1990) Şuşada anadan olmuşdur.

1930-cu ildə - Azərbaycan alimi, psixologiya elmləri doktoru, Azərbaycan Respublikası əməkdar elm xadimi, professor Əkbər Salman oğlu Bayramov Ağdam rayonunun Əlimədətli kəndində anadan olmuşdur.

1944-cü ildə - AXC Parlamentinin üzvü, Azərbaycanda səhiyyənin ilk təşkilatçılarından biri Məmmədrza ağa Mənsur ağa oğlu Vəkilov (1864-1944) Bakı şəhərində vəfat edib. 

1954-cü ildə - Tarix üzrə fəlsəfə doktoru, dosent Boran Orduxan oğlu Əziz Ağdam rayonunun Mərzili kəndində anadan olmuşdur. Görkəmli tarixçi hal-hazırda «Azərbaycan Xalq Cümhuriyyəti dövründə qaçqınlar problemi» mövzusunda doktorluq dissertasiyası üzərində işləyir. 

1954-cü ildə - Filologiya elmləri doktoru, professor, Dövlət mükafatı laureatı, Tiflisdə Qafqaz Xalqları Elmlər Akademiyasının həqiqi üzvü, akademik Y.Məmmədəliyev mükafatının laureatı Nizaməddin Şəmsəddin oğlu Şəmsizadə Quba bölgəsinin İspik kəndində anadan olmuşdur.

1989-cu ildə - Gəncə şəhərinin tarixi adı bərpa edilib. 1918-ci ildə Xalq Cümhuriyyətinin hökuməti Yelizavetpol adını ləğv edərək şəhərin adını özünə qaytarsa da, sovetləşmədən sonra Gəncə Kirovabad adlandırılmışdı.

1991-ci ildə - Səudiyyə Ərəbistanı Azərbaycanın müstəqilliyini tanıyıb. İki ölkənin diplomatik münasibətləri 1992-ci il fevralın 24-də qurulub.

1991-ci ildə - Banqladeş Azərbaycanın müstəqilliyini tanıyıb. Diplomatik münasibətlər 1992-ci il fevralın 26-da qurulub.

1991-ci ildə - Finlandiya Azərbaycanın müstəqilliyini tanıyıb. Diplomatik əlaqələr 1992-ci il martın 14-də yaradılıb.

1991-ci ildə - Livan Azərbaycanın müstəqilliyini tanıyıb. Diplomatik münasibətlər 1992-ci il sentyabrın 18-də qurulub.