1525
31/12/2017 1903-cü ildə - Kinorejissor Mikayıl Yusif oğlu Mikayılov (1903 -1986) Bakıda anadan olmuşdur. 30 film çəkmiş, çəkdiyi 10-a yaxın filmin ssenarisini də yazmış, həmçinin, bir neçə filmdə aktyor kimi çəkilmişdir.
1905-ci ildə - Görkəmli alim, akademik, ictimai xadim, kimya elmləri doktoru, SSRİ Dövlət mükafatı laureatı Yusif Heydər oğlu Məmmədəliyev (1905-1961) anadan olmuşdur. Azərbaycan SSR Elmlər Akademiyasının prezidenti (1947-1951 və 1958-1961) olub.
1914-cü ildə - Sovet İttifaqı Qəhrəmanı Bahyəddin Şahvələd oğlu Mirzəyev (1914-1987) İsmayıllı rayonunun Sulut kəndində anadan olmuşdur.
1915-ci ildə - Texnika elmləri doktoru, professor, Azərbaycan Milli Elmlər Akademiyasının həqiqi üzvü İsmayıl Əli oğlu İbrahimov (1915-2016) keçmiş Naxçıvan quberniyasının (indiki Azərbaycanın Naxçıvan Muxtar Respublikası) Ordubad şəhərində anadan olmuşdur.
1916-cı ildə - Texnika elmləri doktoru, Azərbaycanın əməkdar mühəndisi, Dövlət Mükafatları Laureatı Ələkbər Bağır oğlu Süleymanov (1916-2000) anadan olub.
1916-cı ildə - AMEA-nın müxbir üzvü, tanınmış entomoloq, Hindistan Beynəlxalq Zoologiya Akademiyasının həqiqi üzvü, ASE və qırmızı kitabın müəlliflərindən biri Niyazi Həmid oğlu Səmədov Şəki şəhərində anadan olmuşdur.
1923-cü ildə - Azərbaycan SSR Mərkəzi İcraiyyə Komitəsi Naxçıvan diyarının Azərbaycan SSR tərkibində Naxçıvan MSSR-ə çevrilməsi haqqında qəti qərar qəbul etdi və Zaqafqaziya MİK-dən bu qərarın təsdiq olunmasını xahiş etdi.
1927-ci ildə - Əməkdar rəssam Rasim Hənifə oğlu Babayev (1927-2007) Bakı şəhərində anadan olmuşdur.
1928-ci ildə - Ədəbiyyatşünas, tənqidçi, Filologiya elmləri doktoru, professor, Azərbaycan Respublikasının əməkdar elm xadimi, Azərbaycan Respublikasının əməkdar müəllimi, "Azərbaycan müəllimi" qəzetinin baş redaktoru (1972-1992), "Azərbaycan dünyası" Beynəlxalq Əlaqələr Mərkəzinin eyni adlı nəşriyyatının direktoru (1993-1994), "Şəhriyar" qəzetinin redaktoru (1994-1995), Bakı Şəhər Sovetinin deputatı Şahin Tağı oğlu Səfərov (1928-1995) Naxçıvan Muxtar Respublikası Kəngərli Rayonunun Qarabağlar kəndində müəllim ailəsində anadan olmuşdur.
1931-ci ildə - Azərbaycan MEA A.Bakıxanov adına Tarix İnstitutunun "Azərbaycanın müasir tarixi" şöbəsinin baş elmi işçisi, tarix üzrə elmlər doktoru, professor, Azərbaycan SSR Dövlət Mükafatı laureatı, Əməkdar elm xadimi Tamilla Həşim qızı Musayeva Bakıda anadan olmuşdur.
1933-cü ildə - Azərbaycan Dövlət mükafatı laureatı, fizika-riyaziyyat elmləri doktoru, professor, akademik, 1983-1997-ci illərdə Azərbaycan EA-nın prezidenti olmuş Eldar Yunis oğlu Salayev Naxçıvan şəhərində dünyaya gəlmişdir.
1934-cü ildə - Dramaturq, şair və nasir, teatrşünas, kinoşünas, tərcüməçi, kinossenarist, jurnalist, aktyor, rejissor, əməkdar incəsənət xadimi Cəfər Qafar oğlu Cabbarlı (1899-1934) ürək iflicindən vəfat etdi.
1934-cü ildə - Azərbaycan animator-rejissoru və ssenari müəllifi Bəhmən Əliyev (1934-1993) Bakıda anadan olub. Bəhmən Əliyevin Azərbaycan Respublikası Mərkəzi Dövlət Ədəbiyyat və İncəsənət Arxivində şəxsi fondu yaradılıb.
1942-ci ildə - SSRİ Ali Soveti Rəyasət Heyətinin Fərmanı ilə Həzi Aslanova Sovet İttifaqı Qəhrəmanı adı verildi. H.Aslanovun 55-ci tank alayının 100-dən çox döyüşçüsü SSRİ-nin orden və medalları ilə təltif olundu, alay isə qvardiya alayına çevrildi.
1942-ci ildə - Tarix elmləri doktoru, professor Ağalar Nəriman oğlu Abbasbəyli Bakı şəhərində dünyaya gəlib.
1943-cü ildə - Fizika-riyaziyyat elmləri doktoru, professor, Azərbaycanın Əməkdar müəllimi Rafael Yusif oğlu Əmənzadə (1943-2015) Bakı şəhərində anadan olub.
1947-ci ildə - Kinooperator və fotoqraf, Azərbaycan Fotoqraflar Birliyinin sədri (1998-2007), Azərbaycanın əməkdar incəsənət xadimi, SSRİ Dövlət Mükafatı laureatı Rafiq Əli oğlu Qəmbərov Qroznı şəhərində anadan olub.
1953-cü ildə - UNESCO-nun informasiya və telekommunikasiya üzrə eksperti, 1997-ci ildən Nyu-York Elmlər Akademiyasının, 1998-ci ildən Beynəlxalq İnformasiyalaşdırma Akademiyasının, 2000-ci ildən Beynəlxalq Elmlər Akademiyasının, 2001-ci ildən isə Azərbaycan Milli Elmlər Akademiyasının həqiqi üzvü, 2000-ci ildən Azərbaycan Milli Məclisinin, 2001-ci ildən isə Avropa Şurasının Parlament Assambleyasının üzvü Əli Məmməd oğlu Abbasov Naxçıvan MR-in Şahbuz rayonunda anadan olmuşdur.
1966-cı ildə - Azərbaycan kino rejissoru. Azərbaycan SSR əməkdar incəsənət xadimi Həbib Ələkbər oğlu İsmayılov (1906-1966) vəfat etdi.
1985-ci ildə - Bakı metropoliteninin ikinci növbəsi - "Elmlər Akademiyası", "İnşaatçılar", "XI Qızıl Ordu" (indiki - "20 Yanvar") və "Memar Əcəmi" stansiyaları istifadəyə verildi. Bakı metro stansiyalarının sayı 16-ya, yeraltı magistralın uzunluğu 25 km-ə çatdı.
1989-cu ildə - Naxçıvan Muxtar Respublikasında minlərlə insan SSRİ-İran (Azərbaycan-İran) sərhədində aksiya keçirərək sərhəd dirəklərini sökməyə başlayıb. Onilliklər ərzində bir-birindən ayrı düşmüş şimallı-cənublu azərbaycanlılar Araz çayı üzərində qovuşublar. Bu hadisə Azərbaycan tarixinə həmrəylik aksiyası kimi düşdü. Parlamentin qərarı (25 dekabr 1991) ilə 31 dekabr Dünya azərbaycanlılarının həmrəyliyi günü elan olundu.
1989-cu ildə - Həmin tarixi gündə İstanbulda dünya azərbaycanlılarının ilk konqresi işə başlayıb. Bu, azərbaycanlı diasporunun təşəkkül tapması istiqamətində əlamətdər hadisə idi.
1991-ci ildə - Danimarka Azərbaycanın müstəqilliyini tanıyıb. İki ölkə arasında diplomatik münasibətlər 1992-ci il aprelin 2-də qurulub.
1991-ci ildə - İspaniya Azərbaycanın müstəqilliyini tanıyıb. Diplomatik əlaqələr 1992-ci il fevralın 11-də yaradılıb.
2016-cı ildə - Azərbaycanın əməkdar hüquqşünası, general-mayor Bahadur Məmmədqulu oğlu Hüseynov (1921-2016) vəfat etdi.