1265    

05/01/2017

1819-cu ildə – Naxçıvan xanın nəslindən olan sərkərdə, Rusiya ordusunun süvari generalı İsmayıl xan Ehsan xan oğlu Naxçıvanski (1819-1908) anadan olub.

1884-cü ildə – Opera müğənnisi, əməkdar incəsənət xadimi Əhməd Bəşir oğlu Bədəlbəyli (1884-1954) Şuşada anadan olub. 

1921-ci ildə – 1920-ci ilin noyabrında Azərbaycan SSR Xalq Maarif Komissarlığı yanında əlifba islahatı üzrə komissiya yaradıldı. Bu komissiyanın 1921-ci il yanvarın 5-də qəbul etdiyi qərarda deyilirdi: "Bir tərəfdən, köhnə müsəlman şriftinin çox böyük çatışmazlıqlarını, (digər tərəfdən isə) geniş kütlələrin öyrənilməsi üçün müsəlman dilini asanlaşdırmaq zəruriyyətini də nəzərə alaraq belə qərara alırıq:
a) köhnə müsəlman şriftini yenisi ilə əvəz etmək; 
b) daha mükəmməl latın şrifti üzərində dayanmaq". 

1927-ci ildə – Yazıçı və publisist Əlfi Qasımov (1927-1985) Ağdam rayonunun Poladlı kəndində anadan olub.

1927-ci ildə –  Yazıçı, şair, tərcüməçi Vidadi Yusif oğlu Babanlı Qazax rayonunun Şıxlı (indiki Muğanlı) kəndində anadan olub.

1930-cu ildə – Ümumittifaq Kommunist (bolşevik) Partiyası Mərkəzi Komitəsi "Kollektivləşdirmənin sürəti və kolxoz quruculuğuna dövlət tərəfindən yardım edilməsi tədbirləri haqqında" qərar qəbul etdi. 

1943-cü ildə – Ukraynada Krasnadon şəhəri ətrafında təşkil edilmiş “Gənc qvardiya” partizan dəstəsi rəhbərliyi tərkibində olmuş azərbaycanlı partizan Əli Nəsrulla oğlu Dadaşov yanvarın 5-də həbs edilmiş, 15 gün gestaponun işgəncələrindən sonra yoldaşları ilə birlikdə güllələnmişdi. Ölümündən sonra o, I dərəcəli Vətən müharibəsi ordeni ilə təltif edilmişdi.

1949-cu ildə – Əməkdar artist Kübra Əliyeva Gəncə şəhərində anadan olub.

1955-ci ildə – Əməkdar artist Fərhad İsrafilov Bakı şəhərində anadan olub.

1991-ci ildə – Bakının Dağüstü mədəniyyət və istirahət parkında (indiki "Şəhidlər Xiyabanı"nın ərazisi) 1921-1926-cı illərdə Azərbaycana rəhbərlik etmiş S.M. Kirovun nəhəng heykəli sökülüb.

1994-cü ildə – 5-6 yanvarda Azərbaycan Milli Ordusunun hissələri əks-hücuma keçərək Horadiz qəsəbəsini və Füzulinin 20 kəndini azad edib.