2060    

05/06/2018

2-3 iyun tarixlərində Quba rayonunda "Azərbaycan Vikimedia Könüllüləri" İctimai Birliyi tərəfindən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə "Azərbaycandilli Vikipediya könüllülərinin Bahar düşərgəsi" layihəsi həyata keçirildi. Getdikcə ənənəvi hal almağa başlayan viki düşərgə Azərbaycan Vikimedia Könüllülərinin tarixində yeni bir səhifə açmış oldu.

Ölkəmizdə ikinci dəfə keçirilən viki düşərgədə təcrübəli vikipediyaçılarla yanaşı, Vikipediyada yeni fəaliyyətə başlayanlar da iştirak edirdi. Düşərgənin keçirilməsində məqsəd vikipediyaçıların yanlız virtual deyil, həm də birbaşa olaraq bu cür görüşlərin timsalında qarşılıqlı fikir və təcrübə mübadiləsinə töhfə vermək idi. Vikipediya internetdə müstəqil şəkildə yayımlanan, dünyanın bir çox dillərində viki texnologiyasının tətbiqi ilə könüllü istifadəçilər tərəfindən zənginləşdirilən ensiklopediyadır. Belə bir ensiklopediyanın zənginləşdirilməsinə töhfə verən vikipediyaçıların yay düşərgəsində bir araya gəlməsi Azərbaycanın maddi və mənəvi dəyərlərinin  daha obyektiv və sistemli şəkildə təbliği yönündə mühüm bir addım idi. Mənim üçün həm vikipediyaçı, həm də viki təlimlər keçirən bir təlimçi kimi bu düşərgədə iştirak olduqca faydalı və maraqlı oldu. Çünki bu tədbirdə "Azərbaycan Vikimedia Könüllüləri" İctimai Birliyinin sədri Elgün Ataliyev, təcrübəli vikipediya idarəçiləri - Tərxan Paşazadə, Eldar Əzimov, Emin Allahverdi, Sərkan Şəntürk də iştirak edirdi.

Yay düşərgəsində iştirak mənə virtual olaraq tanıdığım insanlarla səmimi ünsiyyət qurub təcrübə mübadiləsi etmək imkanı qazandırdı. AMEA-nın Coğrafiya İnstitutunun vikipediya qrupunun rəhbəri Aida xanımla yol yoldaşı olmaq, ispandilli vikipediyada milli-mənəvi dəyərləmizin təbliğinə dair yaratdığı dəyərli məqalələrlə töhfə verən Sahibə xanımla, bu işi ərəbcə vikipediyada görən Lalə xanımla, Azərbaycan dilli vikipediyada fəal istifadəçi olan Ceyla xanımla tanışlıq mənim üçün həm xoş, həm də faydalı oldu.

Tədbirin ən faydalı tərəflərini saymaqla bitməz. Vikidüşərgədə təlimlərin keçirilməsi, Vikipediyada yeni məqalələrin yaradılması, Qubanın tarixi ilə yaxından tanışlıq üçün gəzintinin təşkili mənim üçün də faydalı və maraqlı oldu. Xüsusilə Quba gəzintisində işlərini sevən və məlumatlı bələdçi heyətinin gördüyü iş məni və tədbir iştirakçılarını məmnun etdi.

Müxtəlif rayonlarımıza səfərlərdə iştirak edən biri kimi maddi və mənəvi dəyərlərimizə bu qədər bağlı olan və onu hər vəchlə qarşısındakına aşılamağa çalışan bələdçiləri tanımaq mənim üçün qürurverici hal idi. Xüsusilə Quba Soyqırımı Memorial Kompleksinə səfər edilməsinə görə təşkilatçılara minnətdaram. Bu abidə 2018-ci il “Cümhuriyyət” ili çərçivəsində ermənilər tərəfindən xalqımıza qarşı həyata keçirilən soyqırımlarını anmaq və Cümhuriyyət xadimlərinin bu hadisəni dünyaya çatdırmaq üçün yaratdıqları Fövqəladə Təhqiqat Komissiyasının fəaliyyətinə bir daha nəzər salmaq baxımdan faydalı idi. Mənim o kompleksdən yüksək təəssüratlarla ayrılmağımda böyük pay sahibi olan Lətafət xanım Beybutovaya xüsusi təşəkkür edirəm. Vikipediya təşkilatçılarının Azərbaycanın tolerant bir ölkə kimi rəmzi olan Qırmızı qəsəbəni səfər ediləcək yerlər siyahısına daxil etməsi məni çox sevindirdi. Çünki "Qafqazın Yerusəlimi" adlandırılan bu qəsəbə nəinki dini, həm də etnik tolerantlıq simvoludur və ölkəmizdə digər din və millətlərin mənsublarına qarşı nümayiş etdirilən tolerantlığın ən gözəl nümunəsidir. Yəhudilərin kompakt şəkildə yaşadığı Qırmızı qəsəbəni və onların ibadət evi olan sinaqoqla tanışlıqdan savayı Heydər Əliyev mərkəzi, Heydər Əliyev bağı, Tağlı körpü, Hündür Günbəzli hamam, Quba Cümə məscidi və tarixi muzeyi kimi görməli yerləri ziyarət etdik. Heydər Əliyev mərkəzində Elza xanım ümummilli liderimiz Heydər Əliyevin həyat yoluna dair verdiyi məlumatlarla müstəqil Azərbaycanın qurucusu olan Ulu Öndər barədə biliklərimizi daha da zənginləşdirdi. Minirə xanım Musayeva bizə Qubanın tarixi hamamının tarixçəsi barədə geniş məlumat verdi. Quba Rayon Tarix-Diyarşünaslıq Muzeyində isə Məsmə xanımın verdiyi məlumatlar Qubanın tarixinə qısa ekskursiya etməyimizə imkan yaratdı.

Səfər zamanı oynadığımız müxtəlif intelektual oyunlar həm əyləncəli, həm də marrifləndirici idi. Bu cür əyləncə xarakterli oyunların təşkili həm yol yorğunluğumuzu üzərimizdən atmağa imkan verdi, həm də düşərgə iştirakçılarının bir-birinin bilik və bacarıqlarına yaxından bələd olmasına şərait yaratdı.   

Gəzdiyimiz  bu məkanlar və əldə etdiyimiz zəngin məlumatlar səfər sonrası vikipediyada Azərbaycanın bu səfalı bölgəsi – Quba ilə bağlı məlumatları daha da zənginləşdirməyimizə imkan verdi. Səfər əsnasında çəkdiyimiz şəkilləri Wikimedia Commons layihəsinə yerləşdirməklə təəssüratlarımızı dünya vikipediyaçıları ilə də paylaşmış olduq.

İyun ayının 3-də Qubadan Bakıya doğru geri qayıdış əslində daha bir Viki düşərgənin başa çatması deyil, yeni-yeni viki düşərgələrin müjdəçisi idi. Viki düşərgənin təşkilində əməyi keçən hər kəsə, xüsusilə də "Azərbaycan Vikimedia Könüllüləri" İctimai Birliyinin sədri Elgün Ataliyevə öz təşəkkürümü bildirirəm. Bu cür düşərgələrin davamlı olacağını diləyir və bu ümidlə səfər təəssüratımı yekunlaşdırıram. 

Müəllif: GÜNAY MƏMMƏDOVA, AMEA Mərkəzi Elmi Kitabxanasının Sərbəst Elektron Resursları ilə iş şöbəsinin Təlimlər bölməsinin rəhbəri