1294    

06/02/2017

1586-cı ildə - Təbriz qalasında yerləşdirilmiş Osmanlı hərbi hissəsinin başçısı Cəfər paşa şəhərin ələ keçirilməsindən təqribən 5 ay sonra İstanbula göndərdiyi məlumatında qeyd edirdi ki, Təbrizdə yalnız 1500 nəfər qalmışdır və bu adamlar çox yoxsul həyat sürməkdədirlər. Təbrizlilər doğma şəhəri tərk edərək Qaradağa, Qəzvinə və başqa şərq bölgələrinə köçmüşdülər. 

1919-cu ildə - Xalq artisti, kinorejissor, ssenari müəllifi, aktyor, əməkdar incəsənət xadimi Tofiq Mehdiqulu oğlu Tağızadə (1919-1998)  Bakı şəhərində anadan olmuşdur. "Uzaq sahillərdə", "Yeddi oğul istərəm", "Dədə Qorqud" və s. filmləri ilə milli kinomuza dəyərli töhfələr verib.

1924-cü ildə - Məşhur musiqiçi, dirijor, bəstəkar, ifaçı və musiqi təşkilatçısı, xalq artisti Tofiq Qəzənfər oğlu Əhmədov Bakıda ziyalı ailəsində anadan olmuşdur.

1951-ci ildə - Azərbaycanlı diplomat, pedaqoq, tarix elmləri namizədi, görkəmli ictimai-siyasi xadim, tarixçi Cavanşir Mehdixan oğlu Vəkilov (1951-2013) Bakı şəərində anadan olub. 

1988-ci ildə - Azərbaycanın Milli Qəhrəmanı Mübariz Ağakərim oğlu İbrahimov (2010) Biləsuvar rayonu Əliabad kəndində anadan olmuşdur.  

1991-ci ildə - Azərbaycan Respublikası Ali Sovetinin qərarı ilə Şaumyan (kənd) rayonu ləğv edilib, rayonun ərazisi Goranboy rayonu ilə birləşdirilib. Mirbəşir rayonu Tərtər, Şamxor isə Şəmkir adlandırılıb.

1992-ci ildə - Erməni silahlı qüvvələri 1991-ci ilin dekabrından mühasirədə saxladıqları strateji əhəmiyyətli Sırxavənd kəndini (Ağdərə rayonu) işğal edib. 1992-ci ilin yayında Milli Ordunun Qarabağın şimalında apardığı əməliyyat zamanı Ağdərə rayonunun böyük hissəsi, o cümlədən Sırxavənd işğalçılardan təmizlənmişdi. 1993-cü ilin fevralında bu ərazilər xəyanət nəticəsində yenidən ermənilərin əlinə keçdi.

1993-cü ildə - Məşhur müğənni, xalq artisti Şövkət Feyzulla qızı Ələkbərova (1922-1993) vəfat edib. 

1993-cü ildə - Leytenant E.İsmayılov Ağdərə rayonun Çıldıran yüksəkliyi ətrafında gedən döyüşdə itgin düşmüşdür.

2005-ci ildə - Prezident İlham Əliyev manatın denominasiyası haqqında fərman imzalayıb. Fərmana əsasən, 2006-cı il yanvarın 1-dən dövriyyəyə yeni əskinaslar (1 yeni manat (AZN) - 5000 köhnə manat nisbətində) buraxıldı. 1992-ci ildən dövriyyədə olan köhnə manatlar 2006-cı il dekabrın 31-də tədavüldən çıxarıldı.

2007-ci ildə - Tiflisdə Azərbaycan prezidenti İlham Əliyev, Gürcüstan prezidenti Mixail Saakaşvili, Türkiyə baş naziri Rəcəb Tayyib Ərdoğanın iştirakı ilə Bakı-Tiflis-Qars dəmir yolu layihəsi ilə bağlı sənədlər, regional əməkdaşlıq haqqında "Tiflis bəyannaməsi" imzalanıb. Layihənin Gürcüstan hissəsinin maliyyəsi üçün krediti Azərbaycan ayırıb.  

2011-ci ildə - Metyu Brayza ABŞ-ın Azərbaycandakı səfiri kimi Bakıdakı səfirlikdə fəaliyyətə başlayıb. Metyu Brayza Azərbaycan dövlət müstəqilliyini bərpa edəndən bəri ABŞ-ın ölkəyə təyin etdiyi 7-ci səfirdir.