1404    

09/04/2019

AMEA-nın Arxeologiya və Etnoqrafiya İnstitutunun Daş dövrü arxeologiyası şöbəsinin müdiri, t.e.d., professor Əsədulla Cəfərovun “Qarabağ: Ulu Vətənimiz” adlı kitabı çapdan çıxıb.

Nəşrin rəyçiləri tarix elmləri doktoru, professor Abbas Seyidov və tarix elmləri doktoru Qafar Cəbiyevdir.

Vəsait müəllifin uzun illər ərzində Qarabağda apardığı arxeoloji tədqiqat işlərinin nəticələrinə, həmçinin elmi və pedaqoji fəaliyyətinin yekunlarına həsr olunub.

IV bölmədən ibarət olan əsərin I bölməsində müəllif orta məktəb illərindən, ilk dəfə Qarabağa qədəm basdığı günlərdən, Azıx, Tağlar və digər abidələrdə aparılan arxeoloji tədqiqatlardan, tapılmış maddi-mədəniyyət qalıqlarından söhbət açır.

Əsərin II bölməsi Ə.Cəfərovun dövri mətbuata verdiyi müsahibələrdən ibarətdir. Müəllif müsahibələrində Azıx düşərgəsində aşkar olunan ayrı-ayrı quruçay, qədim aşel, orta aşel, son aşel, mustye və üst paleolit arxeoloji mədəniyyətləri haqqında geniş məlumatlar verir. Kitabda Qarabağın, o cümlədən Azıx paleolit düşərgəsinin tarixini saxtalaşdırmağa cəhd edən ermənilərin əsassız fikirləri müəllif tərəfindən faktlarla təkzib olunur.

Əsərin III bölməsi Ə.Cəfərovun dövri mətbuatda çap olunan məqalələrindən ibarətdir. Bu bölmədə Qarabağın arxeoloji mədəniyyətləri Azıx, Tağlar, Şuşa, Naxçıvanın Qazma, Lerikin Buzeyir və Zuvandçay düşərgələrində tapılan maddi-mədəniyyət qalıqları müəllifin elmi-publisistik məqalələrində geniş şərh edilir.

Əsərin IV bölməsini Ə.Cəfərov haqqında dövri mətbuatda yazılan məqalələr və onun çap etdirdiyi kitablara yazılan rəylər təşkil edir. Burada ayrı-ayrı Azərbaycan, keçmiş Sovet və Avropa alimləri müəllifin apardığı tədqiqatlar və onun çap etdirdiyi kitablar haqqında öz fikirlərini bildiriblər.

Nəşr ali təhsil müəssisələrinin müəllim və tələbələri, magistrantlar, doktorantlar və geniş oxucu kütləsi üçün nəzərdə tutulub.