1351    

03/07/2019

Bakı şəhərində təşkil olunan UNESKO-nun Ümumdünya İrs Komitəsinin 43-cü sessiyasının keçirilməsi ölkəmizin mədəni həyatında əhəmiyyətli bir hadisədir. Bu hadisə çərçivəsində Azərbaycan Xalça Muzeyində “Azərbaycan mədəni irsi Luvr Muzeyində” adlı sərgi 3 iyul – 30 sentyabr 2019-cu il tarixlərində təqdim olunacaq.

Sərginin rəsmi açılış mərasimi 2 iyul tarixində saat 19:30-da baş tutdu.

“Azərbaycan mədəni irsi Luvr Muzeyində” adlı sərginin keçirilməsi ölkəmizin mədəni həyatında çox önəmli bir haldır. Belə ki, mədəniyyət tariximizdə ilk dəfə olaraq dünya şöhrətli Luvr Muzeyinin daimi ekspozisiyasında sərgilənən üç nadir eksponat nümayiş olunacaqdır. Bu eksponatlar XVIII əsrin sonu-XIX əsrin əvvəllərinə aid nadir nümunələr - "Çələbi", "Xanlıq" (Qarabağ) və "Əjdahalı" (Şirvan) xalçalarından ibarətdir. 

Layihə “Azərbaycan Respublikasında xalça sənətinin qorunması və inkişaf etdirilməsinə dair 2018-2022-ci illər üçün Dövlət Proqramı”nın həyata keçirilməsi istiqamətində Azərbaycan Xalça Muzeyinin töhfəsidir.

Sərgi Azərbaycan Respublikasının Mədəniyyət Nazirliyi, Azərbaycan Xalça Muzeyi, Fransanın Azərbaycandakı Səfirliyi, Luvr Muzeyi, Azərbaycanda Fransa İnstitutu və “SILK WAY WEST AIRLINES” QSC-nin təşkilatçılığı ilə həyata keçirilir.