1474    

08/02/2017

1924-cü ildə - Azərbaycanın tərkibində Naxçıvan Muxtar Respublikası yaranıb. Naxçıvanın muxtariyyəti ilk dəfə 1918-ci ilin noyabrında, ermənilərin bölgəyə hücumları zamanı elan olunmuşdu. Xalq Cümhuriyyəti bölgəyə kömək etmək imkanında deyildi və Naxçıvanda Araz Türk Cümhuriyyəti elan olunmuşdu. Sovetləşmədən sonra Türkiyənin dəstəyi ilə Naxçıvanın muxtariyyəti saxlanıldı. 1921-ci ilin Moskva və Qars müqavilələri bölgənin Azərbaycanın ayrılmaz hissəsi (Naxçıvan SSR) olduğunu təsbitlədi. 1923-ci ildə Naxçıvan Muxtar Diyarı adlanıb, 1924-cü il fevralın 9-da muxtar respublika Naxçıvan MSSR) statusu alıb. 1990-cı ilin 17 noyabrından Naxçıvan Muxtar Respublikası adlanır. Sovetləşmədən sonra Naxçıvan ərazisinin bir qismi (o cümlədən Şərur-Dərələyəz bölgəsi) Ermənistana verilib. Hazırda Naxçıvan MR-in ərazisi (5,5 min kv km) Naxçıvan şəhəri və 7 inzibati rayondan (Babək, Kəngərli, Culfa, Ordubad, Sədərək, Şahbuz, Şərur) ibarətdir.

1924-cü ildə - Görkəmli heykəltəraş, Azərbaycan Rəssamlar İttifaqının üzvü, əməkdar incəsənət xadimi, xalq rəssamı Mirələsgər Mirəsədulla oğlu Mirqasımov (1924-2003) Bakı şəhərində müasir Azərbaycan tibb elminin əsaslarını qoyanlardan biri Mirəsədulla Mirqasımovun ailəsində anadan olmuşdur.  

1936-cı ildə - Bəstəkar, əməkdar incəsənət xadimi, pedaqoq, ictimai musiqi xadimi Məmməd Mehdi oğlu Quliyev (1936-2001) Göyçayda anadan olub.

1937-ci ildə - Görkəmli kinorejissor, ssenari müəllifi Ramiz Paşa oğlu Əsgərov (1937-1967) anadan olub. 

1938-ci ildə - SSRİ, ZSFSR və Azərbaycan SSR-də yüksək dövlət vəzifələri tutmuş dövlət xadimi Qəzənfər Mahmud oğlu Musabəyov (1888 - 1938) repressiya qurbanı olunmuşdur.

1942-ci ildə - Azərbaycan Respublikasının İqtisadi siyasət məsələləri üzrə Dövlət müşaviri Vahid Cümşüd oğlu Axundov Bakı şəhərində anadan olub.

1958-ci ildə - Tarixçi alim, Azərbaycan Texniki Universitetinin tarix kafedrasının müdiri, tarix elmləri doktoru, professor Şikar Məhəmmədəli oğlu Qasımov Laçın rayonunun Cicimli kəndində anadan olub.

1993-cü ildə - Azərbaycanın Milli Qəhrəmanı, Qarabağ müharibəsi iştirakçısı Namiq Vahid oğlu Abdullayev (1974-1993) Xocavənd istiqamətində gedən döyüşlərdə şəhid oldu.

1993-cü ildə -  Qarabağ müharibəsi iştirakçısı Tofiq Sabir oğlu Məhərrəmov (1973-1993) Ağdamın Mərzili kəndi istiqamətində gedən döyüşlərdə şəhid oldu.

1993-cü ildə - Azərbaycan Ordusunun Dağlıq Qarabağın şimalındakı birləşmələri xəyanət nəticəsində mühüm strateji mövqeləri itiriblər. Korpus komandiri, Qarabağ üzrə prezidentin səlahiyyətli nümayəndəsi Surət Hüseynovun əmri ilə qoşun birləşmələri Ağdərə rayonundakı mövqelərdən geri çəkilməyə başlayıb. Fevralın 10-da ölkə rəhbərliyi S.Hüseynovu tutduğu vəzifələrdən azad edib.

1995-ci ildə - Azərbaycan Bosniya və Herseqovina ilə diplomatik münasibətlər qurub.

1996-cı ildə - Azərbaycan Respublikası Milli Paralimpiya Komitəsi yaradılmışdır

2004-cü ildə - Azərbaycan Respublikası Prezidentinin Sərəncamı ilə Astara və Lənkəran rayonu ərazisində Hirkan Milli Parkı yaradılmışdır.

2007-ci ildə - Prezident İlham Əliyev 2007-ci ilin Azərbaycanda "Gənclər ili" elan edilməsi haqqında sərəncam imzalayıb. 

2010-cu ildə - Fəlsəfə elmləri doktoru, professor, əməkdar elm xadimi Cəmil Teymur oğlu Əhmədli (1931-2010) vəfat edib.