1144    

10/02/2017

1828-ci ildə - Rusiya ilə Qacarlar arasında ikinci müharibənin (1826-1828) yekunlarına əsasən, Türkmənçay sülh müqaviləsi imzalanıb. Təbrizin 50 km-dəki Türkmənçay kəndində Rusiya generalı İvan Fyodoroviç Paskeviç və Qacar şahzadəsi Abbas Mirzənin imzaladığı müqaviləyə əsasən, İrəvan və Naxçıvan xanlıqları Rusiyaya birləşdirilib. Türkmənçay müqaviləsi ilə Azərbaycan torpaqlarının Rusiya və Qacarlar arasında Araz çayı boyunca bölüşdürülməsi başa çatıb. Müqavilədə Qacarlar dövləti hüdudlarından erməni əhalisinin Rusiya imperiyasının yeni torpaqlarına (İrəvan, Naxçıvan, Qarabağ və s.) köçməsi, Qacarların Rusiyaya təzminat (20 mln.rubl) ödəməsi, Rusiya donanmasının Xəzərdə şəriksiz hakim olması və rus tacirlərin Qacarlar dövlətində ticarət güzəştləri əldə etməsi barədə maddələr də vardı.

1918-ci ildə - Nasir, Azərbaycan ədəbiyyatında detektiv janrının banisi, Azərbaycan Yazıçılar Birliyinin üzvü Cəmşid Cabbar oğlu Əmirov (1918-1982) Naxçıvan şəhərində anadan olmuşdur.

1927-ci ildə - AMEA-nın Əlyazmalar İnstitutunun direktoru, görkəmli alim, professor, əməkdar elm xadimi Cahangir Vahid oğlu Qəhrəmanov (1927-1995) anadan olub. 

1939-cu ildə - Tarix elmləri doktoru, professor, Əməkdar elm xadimi, AMEA-nın həqiqi üzvü, Azərbaycan Respublikası Milli Məclisinin (Parlamentinin) deputatı, AMEA Tarix İnstitutunun direktoru, 1999-cu ildə mərhum dövlət başçısı Heydər Əliyevin fərmanı ilə Azərbaycanda tarix elminin inkişafındakı xidmətlərinə və respublikanın ictimai-siyasi həyatında fəal iştirakına görə “Şöhrət” ordeni, 2009-cu ildə isə Prezident İlham Əliyevin sərəncamı ilə Azərbaycanda tarix elminin tədqiqi və tədrisində böyük xidmətlərinə görə “Şərəf” ordenilə təltif edilmiş Mahmudov Yaqub Mikayıl oğlu Şəki rayonunun Baş Göynük kəndində anadan olmuşdur.

1942-ci ildə - Texnika elmləri doktoru, professor, AMEA-nın müxbir üzvü, Azərbaycan Dövlət Neft və Sənaye Universitetinin Avtomatlaşdırılmış idarəetmə sistemləri kafedrasının sabiq müdiri, MBA proqram direktoru, ADNA, Corciya Dövlət Universiteti, Atlanta, ABŞ, BBA Proqram direktoru, "Zadə irsi və süni intellekt" Assosiasiyasının prezidenti Rafiq Əziz oğlu Əliyev Ağdam rayonunun Novruzlu kəndində anadan olmuşdur. 

1976-cı ildə - Azərbaycan Kommunist Partiyasının Mərkəzi Komitəsi "Azərbaycan Sovet Ensiklopediyasının baş redaksiyasının və elmi-redaksiya şurasının yeni tərkibi" haqqında qərar qəbul etdi. Akademik Cəmil Quliyev Baş redaktor təyin olundu.

1992-ci ildə - Azərbaycanla Meksika (ölkəmizin müstəqilliyini 1991-ci il dekabrın 25-də tanıyıb) arasında diplomatik münasibətlər qurulub.

1994-cü ildə - Azərbaycanın Milli Qəhrəmanı, Qarabağ müharibəsi iştirakçısı Qorxmaz Abış oğlu Eyvazov (1967-1994) Cəbrayıl rayonu Cocuq-Mərcanlı kəndi uğrunda gedən döyüşdə şəhid olmuşdu. 

1998-ci ildə - Milli Məclis prezident Heydər Əliyevin qanunvericilik təşəbbüsü ilə Azərbaycanda ölüm hökmünün ləğv edilməsi haqqında qanun qəbul edib. Heydər Əliyev 1993-cü ildə hakimiyyətə gələndən sonra ölüm hökmlərinin icrasına moratorium qoyulmuşdu. Azərbaycan müsəlman ölkələri arasında birinci olaraq ölüm hökmünü ləğv etdi.

2006-cı ildə - Paris yaxınlığındakı Rambuye qəsrində Azərbaycan və Ermənistan prezidentləri arasında Dağlıq Qarabağ münaqişəsinin nizamlanması ilə bağlı növbəti danışıqlar raundu başlayıb. Fransa prezidenti Jak Şirakın vasitəçiliyi ilə iki gün sürən danışıqlar erməni tərəfin qeyri-konstruktivliyi üzündən müsbət nəticə vermədi.   

2013-cü ildə - Fizika-riyaziyyat elmləri doktoru, akademik, Azərbaycan Milli Elmlər Akademiyasının prezidenti (2001-2013) Mahmud Kərim oğlu Kərimov (1948-2013) Ankarada vəfat edib.