1029    

12/02/2017

1910-cu ildə - Filologiya elmləri doktoru, professor Nəzakət Həsən qızı Ağazadə (1910-1979) anadan olub. Azərbaycan Xalq Cümhuriyyəti parlamentinin sədr müavini Həsən bəy Ağayevin qızıdır. 

1940-cı ildə - Nasir, tərcüməçi Rafiq Şamil oğlu İmanov anadan olub.

1946-cı ildə - Görkəmli aktyor Əliabbas Gülabbas oğlu Qədirov (1946-2006) Bakıda anadan olub.

1965-ci ildə - Şair, publisist, tərcüməçi Rafiq Hümmət oğlu Hümmətov (Rafiq Hümmət) Gürcüstanın Bolnisi rayonunun Darvaz kəndində anadan olub.

1971-ci ildə - Şair, qəzəlxan, meyxanaçı Məşədibaba Bilal oğlu Aydəmirov (1971-2011) Bakı şəhərinin Maştağa qəsəbəsində anadan olub. 

1975-ci ildə - Azərbaycanın Milli Qəhrəmanı Xanoğlan Sadiq oğlu Məmmədov (1975 - 1995)  Neftçala rayonunun Beşdəli kəndində anadan olmuşdur. 

1990-cı ildə - Yevlax-Laçın yolunun 105-ci km-də Şuşa-Bakı marşrutu üzrə hərəkət edən sərnişin avtobusu partladıldı, 13 azərbaycanlı yaralandı. Terroristləri ələ keçirmək mümkün olmadı.  

1990-cı ildə - Ermənistan SSR Ali Soveti Rusiya K(b)P MK-nın Qafqaz Bürosunun Dağlıq Qarabağı Azərbaycanın tərkib hissəsi kimi qeyd edən qərarının (5 iyul 1921-ci il tarixli) qeyri-qanuni olması barədə qərar qəbul edib. 

1992-ci ildə - Dağlıq Qarabağ münaqişəsi ilə bağlı regiona ATƏT-in (o vaxt ATƏM adlanırdı) ilk missiyasının səfəri başlayıb.Çexoslovakiya (ATƏT-ə sədrlik edirdi) prezidenti administrasiyasının rəhbəri Karel fon Şvartsenberqin başçılıq etdiyi heyət bir həftə ərzində Bakı, İrəvan və Xankəndidə olmuşdu. Bu missiyanın nəticəsi olaraq ATƏT-in Minsk qrupu yarandı.

1993-cü ildə - Yeni Azərbaycan Partiyasının sədri Heydər Əliyevin Bakıda partiyanın üzvləri və təəssübkeşləri ilə ilk görüşü olub. Partiyanın təsis konfransı 1992-ci ilin noyabrında Naxçıvanda keçirilmişdi. Naxçıvan Ali Məclisinin sədri seçiləndən (sentyabr 1991) sonra ilk dəfə Bakıya gələn Heydər Əliyevin respublika rəhbərliyi (prezident Əbülfəz Elçibəy) ilə də görüşü olmuşdu. 

1993-cü ildə - Qarabağ müharibəsi iştirakçısı Mətləb Müseyib oğlu Muradov (1966-1993) Kəlbəcər rayonunun Ağdaban kəndi uğrunda gedən döyüşdə şəhid olub.

1993-cü ildə - Azərbaycanla İordaniya (ölkəmizin müstəqilliyini 1991-ci il dekabrın 28-də tanıyıb) arasında diplomatik münasibətlər qurulub.

2009-cu ildə - Görkəmli xalq şairi, dramaturq, ədəbiyyatşünas, Yazıçılar Birliyinin üzvü, filologiya elmləri doktoru, professor, Azərbaycan MEA-nın həqiqi üzvü, Əməkdar incəsənət xadimi, Dövlət mükafatı laureatı, M.F.Axundov adına ədəbi mükafatın laureatı, Azərbaycan Respublikası Ali Sovetinin deputatı, “İstiqlal” ordeni ilə təltif edilmiş Bəxtiyar Mahmud oğlu Vahabzadə (1925-2009) Bakı şəhərində vəfat edib. 

2010-cu ildə - Sənətşünaslıq doktoru, Azərbaycan Milli Elmlər Akademiyasının həqiqi üzvü, AMEA Memarlıq və İncəsənət İnstitutunun direktoru, professor Rasim Səməd oğlu Əfəndiyev (1928-2010) vəfat etmişdir.