1052
18/02/2017 1369-cu ildə - Dahi Azərbaycan şair və mütəfəkkiri, hürufizm cərəyanının görkəmli nümayəndəsi Seyid Əli Seyid Məhəmməd oğlu İmadəddin Nəsimi (1369-1417) dünyaya gəlib.
1861-ci ildə - Çar II Aleksandr (1855-1881) Təhkimçilik asılılığından çıxmış kəndlilər haqqında Əsasnamə‖ni təsdiq etdi. "Əsasnamə"də kəndli islahatının əsas şərtləri izah edilir, kəndlilər şəxsi azadlıq və öz əmlaklarından sərbəst istifadə etmək hüququ alırdılar, torpağın mülkiyyətçisi isə yenə əvvəlki kimi mülkədarlar qalırdı. Lakin onlar kəndlilərə daimi istifadə üçün həyətyanı və həmçinin pay torpağı verməliydilər. Bunun müqabilində kəndlilər biyar işləməli, həyətyanı sahəni və mülkədarlarla razılaşmaya əsasən torpaq payını satın almaq hüququ verildiyindən, pay torpaqlarını satın alana qədər töycü ödəməli idilər. Mülkədarlar müəyyən şərtlərlə pay torpaqlarının bir hissəsini özlərinə götürmək hüququ alırdılar. Bu hüquqdan istifadə edən mülkədar kəndlilərin əvvəllər istifadə etdiyi ən yaxşı torpaqları kəsib özünə götürdü. Bütün otlaqlar, meşələr, suvatlar mülkədarların sərəncamına keçirildi.
1898-ci ildə - Görkəmli ədəbiyyatşünas, Azərbaycan EA-nın həqiqi üzvüi (akademik), filologiya elmləri doktoru, professor, Azərbaycanın Əməkdar elm xadimi və Əməkdar müəllimi Feyzulla Qasımzadə (1898-1976) Bakının Mərdəkan kəndində anadan olmuşdur.
1920-ci ildə - Azərbaycan Xalq Cümhuriyyətinin Nazirlər Şurasının 1920-ci il yanvarın 30-da “Azərbaycan Respublikasının gerbi və möhürünün, milli himninin və hərbi ordenlərinin layihələrinin hazırlanması haqqında” qərarını əsas tutan Xalq Maarif Nazirliyi 1920-ci ilin fevralın 19-da “Azərbaycan” qəzetində (19.02.1920, № 33) dövlət gerbi və möhürünün təsvirinin, eləcə də milli himnin mətninin layihələrinin hazırlanması barədə müsabiqə elan etdi. Müsabiqədə ən yaxşı milli himnin mətni və musiqisi üçün 50 min rubl, gerb və möhürün ən yaxşı təsvirinə görə isə 25 min rubl mükafat təyin edilmişdi. Layihələr Xalq Maarif Nazirliyinə təqdim edilməli, Milli İstiqlalın ikinci ildönümünədək (28.05.1920) təsdiq edilməli idi. Lakin 27 aprel 1920-ci il rus sovet istilası və Azərbaycan Xalq Cümhuriyyətinin süqutu buna imkan vermədi.
1938-ci il fevralın 19-25-də - Bakıda SSRİ Ağır Sənaye Xalq komissarı L. M. Koqanoviçin iştirakı ilə neft sənayesi qabaqcıllarının Ümumittifaq müşavirəsi keçirildi. Müşavirədə Qroznı, Türkmənistan, Başqırdıstan, Emba, Maykop, Dağıstan, Saxalin, Sızran, Perm neftçilərinin 100 nümayəndəsi iştirak edirdi. Müşavirə bütün neftçiləri "her bir mədəndə, dəzgahda, briqadada və sexdə bütün fəhlələri, mühəndisləri, qulluqçuları "sosialist yarışına qoşulmağa" çağırırdı".
1949-cu ildə - Ədəbiyyatşünas alim, tərcüməçi, publisist, filologiya elmləri doktoru Adilxan Hüseynəli oğlu Bayramov Gürcüstanın Marneuli rayonunun (Borçalı bölgəsi) Sadaxlı kəndində anadan olmuşdur.
1988-ci ildə - Azərbaycanlı əhalinin Ermənistandan deportasiyasına, Ermənistanın Azərbaycana qarşı ərazi iddialarına, Dağlıq Qarabağda başlanan separatçılıq hərəkətlərinə etiraz olaraq Bakıda ilk mitinq - kütləvi çıxış olub.
1993-cü ildə - Azərbaycanın Milli Qəhrəmanı, Qarabağ müharibəsi iştirakçısı Vəzir İsa oğlu Sədiyev (1961-1993) Həsənriz kəndi uğrunda gedən döyüşlərdə şəhid oldu.
1993-cü ildə - Azərbaycanın Milli Qəhrəmanı, Qarabağ müharibəsi iştirakçısı Yusif Vəli oğlu Mirzəyev (1958-1993) Ağdərədə gedən qanlı döyüşlərdə mühasirəyə düşmüş döyüşçüləri xilas edərkən şəhid oldu.
1993-cü ildə - Milli Məclisin qapalı iclasında ölkədəki hərbi-siyasi böhran müzakirə edilib. Hərbi rəhbərlikdəki böhranın əsas günahkarlarından olan müdafiə naziri Rəhim Qazıyev istefa verməyə məcbur olub.
2004-cü ildə - Azərbaycan Ordusunun baş leytenantı Ramil Səfərov Budapeştdə erməni zabitini öldürməkdə ittiham olunaraq həbs edilib. NATO-nun "Sülh Naminə Tərəfdaşlıq" proqramı çərçivəsində təlimlərdə iştirak edən azərbaycanlı zabit erməni hərbçisinin təhqiramiz hərəkətlərinə dözməyərək bu qətli törətmişdi. 2006-cı ilin aprelində Budapeşt məhkəməsinin qərarı ilə R.Səfərov ömürlük həbs cəzasına məhkum edildi.
2007-ci il fevralın 19-26-da - Türkiyənin İstanbul şəhərində və 25 vilayətində “Xocalı həftəsi” adlı tədbirlər proqramı çərçivəsində anım mərasimləri keçirmişdir.