1142
20/02/2017 1876-cı ildə - 1870-ci il kəndli islahatı mülkədar torpaqlarında "könüllülük" əsasında yaşayan kəndlilərə şamil edilmədi. Yelizavetpol quberniyasının 200 kəndində belə kəndlilərin sayı 65 min nəfər idi. 1870-ci il islahatı zamanı bu kəndlilərin çoxu torpaq sahiblərinin özbaşınalığına məruz qalmış və öz torpaqlarının itirmişdilər. İslahat Yelizavetpol quberniyası kəndlilərinə 1876-cı il fevralın 21-dən aid edildi.
1917-ci ildə - Tanınmış yazıçı, dramaturq və publisist, əməkdar incəsənət xadimi Yusif Əhmədulla oğlu Əzimzadə (1917-1984) Bakıda fəhlə ailəsində doğulub.
1921-ci ildə - Müasir Azərbaycan təsviri sənətinin görkəmli nümayəndəsi, xalq rəssamı Böyükağa Məşədi oğlu Mirzəzadə (1921-2007) Bakıda Abşeronun Fatmayı kəndində anadan olmuşdur.
1955-ci ildə - Azərbaycan Respublikasının əməkdar artisti, tarzən, muğam ifaçısı Elxan Bəhram oğlu Mansurov Bakıda, musiqiçi ailəsində anadan olub.
1988-ci ildə - Erməni vandalları İrəvanda qalmış son məscidə hücum edib dağıtdılar və azərbaycanlı orta məktəbi, C.Cabbarlı adına İrəvanın Azərbaycan Dram Teatrının ləvazimatı yandırıldı. İrəvanda bu hadisələrə qarşı etirazını bildirən azərbaycanlıların evlərinə od vurdular.
1988-ci ildə - Əsgəran rayonunda ermənilər 2 nəfər azərbaycanlını qətlə yetirdi, 19 nəfər azərbaycanlı isə yaralandı.
1992-ci ildə - Azərbaycan Fransa və Polşa ilə diplomatik əlaqələr qurmuşdur. Polşa Azərbaycanın müstəqilliyini 1991-ci il dekabrın 27-də, Fransa isə 1992-ci il yanvarın 3-də tanımışdı. Fransa Türkiyədən sonra Azərbaycanda səfirlik açan ikinci ölkə oldu.
1994-cü ildə - Azərbaycan Respublikasının Prezidenti yanında UNESCO üzrə Azərbaycanın Milli Komissiyası yaradılıb. Komissiyaya Azərbaycanın xarici işlər naziri sədrlik edir.
1996-cı ildə - Prezident Heydər Əliyevin sərəncamı ilə Azərbaycanda Hüquq İslahatları Komissiyası yaradılıb. Komissiyada qısa müddətdə ölkə həyatının müxtəlif sahələri üzrə yeni qanun layihələri işlənib hazırlandı və parlamentdə qəbul olundu.
1997-ci ildə - Məşhur şərqşünas, tarixçi, Sovet İttifaqı Qəhrəmanı, Dövlət Mükafatı Laureatı, əməkdar elm xadimi Ziya Bünyadov (1923-1997) yaşadığı binanın qarşısında cinayətkar qrup tərəfindən vəhşicəsinə qətlə yetirilmişdir.
2001-ci ildə – Azərbaycan XİN Dağlıq Qarabağ münaqişəsinin tənzimlənməsi ilə bağlı ATƏT-in Minsk qrupunun 1997-1998-ci illərdə tərəflərə rəsmən təklif etdiyi üç nizamlama planını (“paket həll”, “mərhələli həll”, “ümumi dövlət”) ilk dəfə mətbuat səhifələrində geniş ictimaiyyətin müzakirəsinə çıxartdı.
2001-ci ildə - Bakıda TRASEKA (Avropa-Qafqaz-Asiya Nəqliyyat Dəhlizi) hökumətlərarası komissiyasının daimi katibliyinin ofisi açılıb. Bu layihə Avropa ittifaqının TRASEKA üzv - dövlətlərinə dair qlobal strategiyasına uyğun olaraq, aşağıdakı məqsədlərə xidmət edir:
- Alternativ nəqliyyat marşrutları vasitəsilə Avropa və dünya bazarlarına çıxışı təmin etməklə, bu respublikaların siyasi və iqtisadi sabitliyinə yardım göstərməsi.
- TRASEKA üzv-dövlətləri arasında gələcək regional əməkdaşlığın dəstəklənməsi.
- Beynəlxalq Maliyyə təşkilatları və özəl investorları cəlb etmək üçün TRASEKA layihlərinin geniş istifadəsi.
- Avropa-Qafqaz-Asiya "TRASEKA" Beynəlxalq Nəqliyyat Dəhlizinin Trans-Avropa Şəbəkələri ilə optimal inteqrasiyasının dəstəklənməsi.